БСШУСЯ-наас 2013 онд улсын төсвийн хөрөнгө оруулалтаар мэдээллийн систем хөгжүүлэх багийг бүрдүүлж, боловсролын салбарын мэдээллийн системийг нэвтрүүлснээс хойш тасралтгүй хөгжүүлж ирсэн. Энэ системд НҮБ-ын хүүхдийн сан хамтран үнэлгээ хийж, үр дүнг танилцуулах уулзалтыг зохион байгууллаа.

Бүх хүүхдэд чанартай боловсролыг тэгш хүртээмжтэй хүргэх, шуурхай, найдвартай, нийлэмжтэй мэдээллийг цуглуулах, Боловсролын салбарын менежментийг шинэ шатанд гаргах, нэгдсэн мэдээллийн сан бүрдүүлэхэд мэдээллийн систем чухал үүрэгтэй.

Үнэлгээний үр дүнг хэлэлцэх арга хэмжээг нээж БСШУСЯ-ны Төрийн нарийн бичгийн дарга Б.Баярсайхан хэлсэн үгэндээ “НҮБ-ын Хүүхдийн сангаас хийсэн үнэлгээ, дүн шинжилгээ нь боловсролын удирдлагын мэдээллийн системийн цаашдын үйл ажиллагаанд томоохон хувь нэмэр оруулна. Энэ үнэлгээгээр гарах санал зөвлөмжийг Боловсролын мастер төлөвлөгөө болон Тогтвортой хөгжлийн зорилтын биелэлтийг гаргахад тусгаж ажиллана” гэлээ.

БСШУСЯ 2019 онд Мэдээллийн технологи, статистикийн хэлтсийг байгуулсан. Ингэснээр мэдээллийн системийн бодлого хэрэгжилтийг удирдлагаар хангаж ажиллах боломж бүрдэж байгаа юм.