Монгол Улсын Ерөнхий сайд Ухнаагийн Хүрэлсүх их дээд сургуулиудын манлайлагч шилдэг оюутнуудтай “Чиний боловсрол Монголын ирээдүй” сэдвээр чөлөөт уулзалт ярилцлагыг Соёлын Төв өргөөнд хийлээ.
Уулзалтын өмнө Ерөнхий сайд У.Хүрэлсүх БСШУС-ын сайд Ё.Баатарбилэг нар оюутнуудын бүтээлийн үзэсгэлэнг сонирхсон юм. Оюутнууд юу хийж бүтээж чадахаа харуулсан тус үзэсгэлэнд 15 их дээд сургуулийн оюутнууд 70 гаруй бүтээл дэлгэжээ. Харин уулзалт ярилцлагад 1200 гаруй оюутан оролцлоо.
Уулзалт арга хэмжээний үеэр мөн Боловсрол, соёл, шинжлэх ухаан спортын яам Засгийн газар хоорондын тэтгэлэгт хөтөлбөрийн талаар мэдээлэл өгсөн бол яамны харьяа Боловсролын зээлийн сан Оюутны хөгжлийн зээлийг газар дээр нь олгон ажиллалаа.
Ерөнхий сайд У.Хүрэлсүх оюутнуудын тавьсан асуултад нээлттэй хариулж, тэдэнд эр хүн үүрэг хариуцлагаа ухамсарлан эмэгтэй хүнийг хүндлэхээс эхлээд улс эх орноо хөгжүүлэх зүрх сэтгэлтэй зөв явахын чухлыг онцлон захиж, хөгжлийн талаарх үзэл бодлоо хуваалцлаа.
