Боловсрол, соёл, шинжлэх ухаан, спортын сайд Ё.Баатарбилэг өнөөдөр (2020.02.13) Япон Улсаас Монгол Улсад суугаа онц бөгөөд бүрэн эрхт элчин сайд Кобаяаши Хироюкиг хүлээн авч уулзлаа.

БСШУС-ын сайд Ё.Баатарбилэг Монгол Улсад гурав дахь удаагаа томилогдон ажиллаж байгаа ноён Элчин сайдад баяр хүргээд өнгөрөгч оны наймдугаар сард Япон Улсад албан ёсны ажлын айлчлал хийж, холбогдох салбарын сайд нартай албан ёсны уулзалт хийж, хэд хэдэн чиглэлээр хамтарч ажиллах санал солилцсоноо дурдав.

“Монгол ёс, хүмүүжил” хичээлийн сургалтын хөтөлбөрийг боловсруулсан багийг Япон Улсын сайн туршлагаас суралцуулж, хөтөлбөрийг сайжруулах, Коосэн загварын коллеж нэмж байгуулах зэрэгт анхаарлаа хандуулж ажиллахыг ноён Элчин сайдаас хүслээ. Мөн Монгол Улсын Засгийн газрын тэргүүлэх мэргэжлийн хүрээнд соёлын өв, соёлын өвийн барилга байгууламжийг сэргээн засварлах мэргэжилтэн бэлтгэх хамтарсан тэтгэлэгт хөтөлбөр хэрэгжүүлэх, хөгжлийн бэрхшээлтэй хүүхэдтэй ажиллах багш нарыг бэлтгэх шаардлагатайг онцлов.

Элчин сайд Кобаяаши Хироюки хоёр улсын боловсрол, соёл, шинжлэх ухаан, спортын салбарын хамтын ажиллагааны асуудлаар тодорхой давтамжтай уулзаж, бүх талаар хамтран ажиллаж, олон жилийн хамтын ажиллагааг улам бэхжүүлнэ гэдэгт итгэлтэй байгаагаа илэрхийлсэн юм.