Чингэлтэй дүүрэгт сургалтын үйл ажиллагаа явуулдаг ерөнхий боловсролын сургууль, сургуулийн өмнөх боловсролын байгууллага, их дээд сургууль нийт 22 байгууллага төлөвлөгөөт шалгалтад хамрагдлаа. Шалгалтаар ерөнхий боловсролын сургуулийн хувьд хичээлийн кабинетгүй, сурагчид хамтран ажиллаж туршилт, ажиглалт хийх, мэдлэг бүтээх орчин бүрдээгүй, мэргэжлийн багшлах эрхтэй боловсон хүчнээр бүрэн хангагдаагүй, хүүхдийг ялгаварлан гадуурхагдахаас хамгаалах орчин бүрдүүлж, хүүхдийн эрхийн зөрчил гарахаас урьдчилан сэргийлэх тодорхой, үр дүнтэй ажил зохион байгуулаагүй нийтлэг зөрчил илэрч байна. Сургуулийн өмнөх боловсролын байгууллагын хувьд гадна тоглоомын болон биеийн тамирын талбайгүй, бүлгийн өрөөний хана хэт эрээн, ариун цэврийн өрөөний шаардлага хангахгүй, бүлэг бүрд хүүхдийн танин мэдэхүй, сэтгэхүй, хэл яриаг хөгжүүлэх зорилгоор шаардлага хангасан номын төвгүй, галын аюулгүй байдлын дүгнэлтгүй, галын аюулаас хамгаалах анхан шатны багаж хэрэгсэлгүй зөрчилд ”Зөрчлийн тухай” хуулийн холбогдох заалтын дагуу арга хэмжээ авч ажиллалаа. Шалгалт үргэлжилж байна.
