УИХ-ын чуулганы пүрэв гарагийн нэгдсэн хуралдаанаар Үндсэн хуулийн цэцийн 2021 оны 02 дугаар дүгнэлтийг хэлэлцэж, зарчмын зөрүүтэй зургаан саналаар санал хураасан байна.
Үндсэн хуулийн цэц өнгөрсөн баасан гарагт "Ерөнхийлөгчийн тухай хуулийн 3 дугаар зүйлийн 3.1.2 дахь заалт болон 5 дугаар зүйлийн 5.4 дэх хэсгийн зарим заалт Үндсэн хуулийн холбогдох заалтыг зөрчсөн" гэж үзэн, түдгэлзүүлээд байсан юм. Эдгээр заалтууд нь Монгол Улсын Үндсэн хуулийн 30 дугаар зүйлийн 2 дахь хэсэг, 70 дугаар зүйлийн 1 дэх хэсэгт заасныг тус тус зөрчсөн гэж үзэн чуулганы нэгдсэн хуралдаанд оролцсон гишүүдийн олонх дэмжжээ.
Үүний дараа Үндсэн хуулийн цэцийн 2021 оны 02 дугаар дүгнэлтийг батлах санал хураалт явуулахад гишүүдийн 82.4 хувь нь дэмжсэн байна. Ингэснээр өмнөх болон одоогийн Ерөнхийлөгч нар Ерөнхийлөгчийн сонгуульд дахин нэр дэвших эрхгүй болжээ. Үндсэн хуулийн цэцийн дүгнэлтийг батлах санал хураалтад УИХ дахь Ардчилсан намын бүлэг оролцоогүй байна.
