Хэнтий аймгийн Батноров сумын Бэрх тосгонд олон улсын хөтөлбөртэй 640 хүүхдийн суудал бүхий дунд сургууль нээгджээ. Тус сургуулийн барилгыг 2019 оноос эхлүүлж, 2022 оны төсөвт үлдсэн хөрөнгө оруулалтыг тусгаснаар ийнхүү нээлтэй хийжээ. 2022 оны улсын төсөвт тусгаснаар сургуулийн нийт төсөвт өртөг 5,962.90 сая буюу 6 орчим тэрбум төгрөг бөгөөд 2022 оны төсөвт 1.55 тэрбум төгрөгийг тусгасан байв.
Бэрх тосгонд ийнхүү олон улсын хөтөлбөртэй сургууль байгуулж байгаатай холбоотойгоор 150 хүүхдийн ортой, 1.9 орчим тэрбум төгрөгийн өртөг бүхий дотуур байрыг мөн барихаар төлөвлөж, 2022 барилгын үлдэгдэл төсөв болох 366 сая төгрөгийг мөн тусгасан юм.
Бэрх олон улсын хөтөлбөртэй дунд сургуулийн үйл ажиллагаа намраас албан ёсоор эхлэх бөгөөд одоогийн байдлаар багш нараа чадавхжуулж байгаа талаар тус сургуулийн захирал хэллээ. Зүүн бүсийн аймгуудаас 6-9 дүгээр анги тус бүрд 15 хүүхэд элсүүлэх шалгалт авч, эхний жилд 208 хүүхэд суралцуулахаар төлөвлөсөн байна.
2021 оны эцсийн байдлаар Бэрх тосгон 2,377 хүн амтай байна.
