Шинэ үеийн төлөөлөл болж эх орныхоо маргаашийг бүтээх эдгээр хүүхдүүд маань хамтдаа суралцах, бусдадаа нөлөөлөх, нийгмийг түүчээлэх хүсэл эрмэлзэл дүүрэн байна. Тийм ч учраас “Өсвөрийн парламент” хөтөлбөр тэднийг чиглүүлж, үеийнхэндээ үлгэрлээд зогсохгүй бусад орны хүүхдүүдтэй дуу хоолойгоо нэгтгэж, мэдлэг, чадвараа тэлэхэд нь бүх талаар дэмжих зорилготой байсан.

Хөтөлбөр эхэлснээс хойш хагас жилийн хугацаанд 21 аймаг, 9 дүүргийг төлөөлсөн 90 сурагч ардчилал, хүний эрх, эрх чөлөө, хууль тогтоох үйл ажиллагааны талаар цогц ойлголттой болохоос гадна уур амьсгалын өөрчлөлт, эрүүл амьдралын хэвшил зэрэг сэдвүүдээр цуврал хичээлд хамрагдаж, нөлөөллийн ажлуудыг хэрэгжүүлжээ.

Бас хүсэл сонирхол, хичээл зүтгэлээрээ нэгдсэн сайн найзууд болж, хөтөлбөрөөс олж авсан шинэ санаа, эерэг өөрчлөлт бүхнээ хуваалцаж байгааг харахад таатай байлаа. D-Parliament аппликейшнээрээ дамжуулан санал, санаачлагаа хүргүүлэхээс эхлээд цаашид хийж бүтээх бүхий л ажилд нь та бүхнийг дэмжин оролцох болно.

Өсвөрийн парламентын анхны төгсөгчид өнөөдөр үр дүнгээ хэлэлцэж, нэгдсэн чуулганаа хуралдуулснаар үеийнхээ олон олон сурагч, хүүхдүүдэд энэ хөтөлбөрийн эхлэлийг амжилттай тавьж чадлаа. Дэмжиж оролцсон, хамтран ажилласан бүх байгууллага, сургагч багш, аав ээж нартаа талархал илэрхийлье.