УИХ-ын дарга Г.Занданшатар захирамж гарган сонгуулийн тухай хуулийн төслийг боловсруулах ажлын хэсгийг парламентад суудалтай намуудыг оролцуулан байгуулсан. Эрх баригчдаас УИХ-ын Төрийн байгуулалтын байнгын хорооны дарга Н.Энхболд ажлын хэсгийг ахалж байгаа бол ХҮН-аас Т.Доржханд, АН-аас УИХ-ын дэд дарга С.Одонтуяа тэргүүтэй гишүүд ажлын хэсэгт багтаж байгаа юм. Ажлын хэсэг хуулийн төслөө боловсруулсан бөгөөд дараах өөрчлөлт, онцлогуудыг тусгажээ.
-
Сонгуулийг 38:38 гэсэн холимог тогтолцоогоор явуулна. Гишүүдийн 50 хувь нь тойргоос, 50 хувь нь намын жагсаалтаар сонгогдоно гэсэн үг.
-
Сонгуулийн зардлыг бууруулах хэд хэдэн заалт оруулсан.
-
Гадаадад байгаа сонгогчдын саналыг авна.
-
Намуудын УИХ-д суудал авах босго оноо гурван хувь байна. 2012 онд таван хувь байсныг бууруулж гурав болголоо.
-
Эмэгтэйчүүдийн квотыг 30-аас доошгүй хувь байлгана. Өмнөх хуулиар 20 хувь байсан.
УИХ-ын сонгуулийн тухай хуулийн төслийг боловсруулсан ажлын хэсэг төслөө Засгийн газарт илгээж өнгөрсөн долоо хоногт саналыг нь авсан. Улмаар төслөө энэ долоо хоногт УИХ-д өргөн барьж хэлэлцүүлэхээр төлөвлөөд байсан юм. УИХ дахь МАН-ын бүлгийн дарга Д.Тогтохсүрэн өчигдөр мэдээлэл хийхдээ "Сонгуулийн тухай хуулийн төслийг өнөө маргаашгүй өргөн барина" гэсэн юм. Гэвч хойшлуулсаар маргааш өглөө өргөн барихаар болжээ. Ийнхүү хойшилж байгаа шалтгаан нь УИХ дахь АН-ын бүлгийн байр суурьтай хобоотой бололтой. Ажлын хэсэгт нь гишүүдээ оруулж хамтран боловсруулсан АН-ын бүлэг тусдаа УИХ-ын сонгуулийн тухай хуулийн төсөл өргөн барихаар болжээ. Тус намын бүлэг мөн маргааш төслөө УИХ-д өргөн барихаар төлөвлөсөн байна.
АН-ын бүлэг тойргоос болон намын жагсаалтаар сонгогдох гишүүдийн тоо тэнцүү байх нь буруу, намын жагсаалтыг хаалттай бус нээлттэй буюу иргэдээр сонгуулж эрэмбэлүүлэх нь зөв гэж үзжээ.
