Цол чимэг олгох бүх цэргийн баяр наадам өчигдөр/2023.09.16/ Архангай аймгийн Цэцэрлэг хотноо боллоо. 32 дахь удаагийн уламжлалт барилдаанд нийт 256 бөх хүч үзэв. Үүнээс Өвөрхангай аймгийн Зүүнбаян-Улаан сумын харьяат, Алдар спорт хорооны бөх Б.Өлзийсайхан найм даван түрүүлж, цэргийн арслан цол хүртжээ. Харин үзүүрт Сэлэнгэ аймгийн Мандал сумын харьяат, Алдар спорт хорооны бөх Х.Наранбаяр үлдэж, цэргийн заан цол хүртсэн аж.
Тэгвэл чансаа өндөр цэргийн наадамд түрүүлсэн, ирэх жил улсын цолтон болох магадлал өндөртэй Б.Өлзийсайхан гэж хэн бэ?
Тэрбээр 1993 онд төрж, 2012 онд сумын заан цол хүртжээ. 2013 онд дахин заан цолоо баталж, чөлөөт бөхөөрөө түлхүү амжилт гаргаж эхлэв. Түүний хувьд чөлөөт бөхийн шигшээ багт багтаж, тив дэлхийн томоохон тэмцээн уралдаануудад оролцож байв.
Б.Өлзийсайхан 2018 онд Налайх дүүргийн баяр наадамд зургаа даван шөвгөрч, аймгийн харцага цол хүртсэн юм. Өдийг хүртэл хугацаанд тэрбээр заал, танхимын барилдаанд тогтмол сайн барилдаж, сум, аймгийн цолтнуудын барилдаанд түрүүлээд зогсохгүй Н.Батсуурь даян аварга, О.Хангай аварга, Б.Орхонбаяр арслан тэргүүтэй шилдгүүдийг давж байлаа.
Цол ахих нь тодорхой байсан Б.Өлзийсайхан энэ жил Говь-Алтай аймгийн түүхт ойн баяр наадамд тав давж шөвгөрсөн ч бөхийн холбооноос тус барилдаанд цол, чимэг олгохыг дэмжээгүй юм. Улмаар Б.Өлзийсайхан өчигдөр бүх цэргийн наадамд түрүүлж, цол гуйж биш гуядаж авлаа.
