Энэ ондоо багтааж Засгийн газар шинэ журмыг батлах юм. Ингээд ирэх жилийн сонгон шалгаруулалтыг шинэ журмаар зохион байгуулна. Тэгвэл Ерөнхий сайдын олгодог тэтгэлгийг Засгийн газрын тэтгэлэг болгож, сургалтын хөтөлбөрөөрөө шилдэг 100-д багтаж байгаа сургуулиудад урт болон богино хугацааны сургалтад хамруулдаг байх өөрчлөлт хийхээр Засгийн газар дээр ярьж байгаа аж.

Ерөнхийлөгч, Ерөнхий сайд гадаадын их дээд сургуульд сурах хүүхдүүдэд тэтгэлэг олгодог. Энэ онд Ерөнхийлөгчийн нэрэмжит тэтгэлэгт нийт 251 хүүхэд хамрагдсан бөгөөд үүнд долоон тэрбум төгрөгийн санхүүжилт зарцуулсан байна. Харин Ерөнхий сайдын тэтгэлгээр 28 хүүхэд 2.9 тэрбум төгрөгийн тэтгэлэг олгожээ.

БШУ-ны сайд Л.Энх-Амгалан хэлэхдээ “Шинэ журам гаргах гэж байгаа гээд дараагийн явах гэж байгаа хүүхдүүдэд ямар нэгэн төлбөрийн саатал байхгүй. Цаашдаа Ерөнхийлөгчийн тэтгэлэг үргэлжилнэ. 330 сум 170 хорооноос ЭЕШ-ын хамгийн өндөр оноо авсан нэг хүүхдийг сонгож аваад, хэлний бэлтгэлд бэлдээд дэлхийн шилдэг их, дээд сургуульд явуулдаг хөтөлбөр үргэлжилнэ. Мөн Ерөнхий сайдын нэрэмжит тэтгэлгийг Засгийн газрын тэтгэлэг болгон өөрчлөх асуудлыг Засгийн газар дээр ярьж байгаа. Тэгэхээр цаашдаа мэргэжлээ дээшлүүлэх шаардлагатай байгаа олон хүнийг хамруулж, тухайн мэргэжлээр шилдэг 100-д багтаж байгаа сургуулиудад дунд болон урт хугацааны сургалтад хамруулах нь үр дүнтэй гэж харж байгаа” гэлээ.

Боловсролын зээлийн сан өндөр хөгжилтэй оронд магистр, докторантурын хөтөлбөрт суралцагчид жилд 16000 ам.доллар хүртэлх зээл олгодог байсан. Гадаадад сурах хөтөлбөрт нийт 1867 хүн хамрагдаж, суралцаж байна. Боловсролын зээлийн сан байгуулагдаснаас хойш гадаадад магистр, докторантурын хөтөлбөрт суралцсан 1867 хүнээс 34 нь зээлээ төлж байгаа, 40 нь гэрээгээ цуцлаад, зээлээ төлсөн, 890 нь гэрээнээс чөлөөлөгдсөн бол 230 нь гэрээний үүргээ биелүүлээгүй талаар салбарын сайд танилцуулж байсан. Тэгвэл өнөөдрийн байдлаар гадаад зээлийн эргэн төлөлт 1,142,450.90 ам.доллар байна.