Улсын хэмжээнд томуу, томуу төст өвчин 10,000 хүн амд 60.4 (-5,3) тохиолдол бүртгэгдэж, алаг цоог дэгдэлтийн түвшинд, амьсгалын замын цочмог хүнд халдвар 10,000 хүн амд 7.3 (-0.3) тохиолдол бүртгэгдэж, алаг цоог дэгдэлтийн түвшинд тус тус байна.

Ерөнхий боловсролын сургуулийн суралцагчдын I улирлын амралт дууссан, МСҮТ, политехинк коллеж, их, дээд сургуулиудын хичээл эхэлж байгаатай холбогдуулан, Улсын онцгой комисс, Шуурхай штабын хуралдаанаас өгсөн үүрэг чиглэлийн дагуу Эрүүл мэндийн яам, Боловсролын яамны төрийн нарийн бичгийн дарга нар өнөөдөр хамтарсан уулзалт зохион байгуулж, авч хэрэгжүүлэх хариу арга хэмжээний талаар ярилцлаа.

Эрүүл мэндийн яамны Төрийн нарийн бичгийн дарга Д.Очирбат “Оюутан, суралчдын амралтын үеэр амьсгалын замын өвчин 50%-иар буурсан. Иймд хичээллэх хэлбэр, суралцагчдын амралтын хуваарийг өөрчлөх шаардлагагүй” гэж онцлов. Хичээл эхлэх үед ханиад, томуу буцаад нэмэгдэх тул хариу арга хэмжээ авахад анхаарах юм байна.

Хүйтний эрч сулраагүй, агаарын бохирдол их байгаа энэ үед бүх түвшний боловсролын байгууллагын багш, сурагч, ажиллагсдыг амны хаалт зүүж хэвших, мэргэжлийн байгууллагаас өгөх зөвлөмж, зааврыг дагаж ажиллахыг зөвлөж байна.