Монгол Улсын 32 дахь ерөнхий сайд Л.Оюун-Эрдэнэ энэ сарын 3-ны өдөр огцров.
     
Үндсэн хуулийн Дөчин гуравдугаар зүйлийн 2 дахь хэсэг, Дөчин дөрөвдүгээр зүйлийн 2 дахь хэсэгт заасны дагуу шинэ Ерөнхий сайдыг 30 хоногийн дотор томилох хуультай. Энэ хугацаа ирэх сарын 3-ны өдөр дуусна. Тэгэхээр Монгол Улсын 33 дахь Ерөнхий сайд наадмын өмнө томилогдох нь.   
 
Үндсэн хуулийн Дөчин гуравдугаар зүйлийн 2 дахь хэсэгт “Ерөнхий сайд огцорвол Засгийн газар бүрэлдэхүүнээрээ огцорно.” гэж заасан. Шинэ Ерөнхий сайд Засгийн газрын бүрэлдэхүүнийг хуульд заасны дагуу томилно.

Хэрэв 30 хоногийн дотор дараагийн Ерөнхий  сайдыг томилж чадахгүй бол УИХ-ын тухай хуулийн 34.3.2, 34.3.3-т заасны дагуу Ерөнхийлөгч УИХ-ыг тараах шийдвэр гаргана.  

Дараагийн Засгийн газрыг бүрдүүлж, сайд нарыг нь ажилд томилох хүртэл одоогийн сайд нар ажлаа хийнэ. Ерөнхий сайдыг Тэргүүн шадар сайд Л.Гантөмөр орлож, төрийн ажлыг цалгардуулахгүй явуулах үүрэгтэй.

Ерөнхий сайд Л.Оюун-Эрдэнэ эрх баригч нам болох МАН-ын дарга бөгөөд Ерөнхий сайд байв. Дараагийн Ерөнхий сайдыг МАН-ын УЗ-өөс Бага хурлын гишүүдэд танилцуулна. Мөн МАН-ын бага хурлын үеэр заалнаас буюу оролцогч хүсвэл хэн нэгнийг намын дарга бөгөөд Ерөнхий сайдад нэр дэвшүүлэх эрхтэй юм.

Өнөөдрийн байдлаар ЗГХЭГ-ын дарга Н.Учрал, Шадар сайд С.Амарсайхан, ЕТГ-ын дарга Г.Занданшатар, Сангийн сайд Б.Жавхлан нарын нэрс дараагийн Засгийн газрын тэргүүнд яригдаж байна.