Монголын Диф спортын хороо /МДСХ/-ны хүсэлтээр ОУОХ-ны гишүүн, МҮОХ-ны Ерөнхийлөгч Б.Баттүшиг өнөөдөр тус хорооны Ерөнхийлөгч Д.Баасандорж, ЕНБД Т.Долгорсүрэн тэргүүтэй баг тамирчдыг хүлээн авч уулзлаа.
Япон улсын Токио хотноо 2025 оны 11 дүгээр сарын 15-26-ны өдрүүдэд Зуны XXV удаагийн Сонсголын бэрхшээлтэй тамирчдын дэлхийн наадам (Дифлимп) зохиогдох бөгөөд Монгол Улсаа төлөөлөн 25 хүний бүрэлдэхүүнтэй баг тамирчид оролцох ажээ.
Уулзалтын үеэр МДСХ-ны зүгээс Дифлимпын наадам нь 1924 оноос хойш зохиогдож байгаа сонсголын бэрхшээлтэй тамирчдын хувьд хамгийн нэр хүндтэй олон улсын наадам болохыг онцлоод тусгай хэрэгцээт иргэдийн эрх ашиг, хүсэл сонирхлыг спортоор дамжуулан олон нийтэд сурталчлан таниулахад оруулж буй хүчин зүтгэлийг үнэлж байгаагаа илэрхийлсэн талархлыг МҮОХ-ны Ерөнхийлөгч Б. Баттүшигт гардуулан өглөө.
МҮОХ-ноос "Токио 2025" Дифлимпын наадамд оролцох баг тамирчдадаа амжилт хүсч, нэгдсэн бэлтгэлийн хослол болон тодорхой мөнгөн дэмжлэг үзүүлэв гэж Монголын Үндэсний Олимпын Хорооноос мэдээллээ.
