Эрүүл мэндийн даатгалын ерөнхий газар хувийн эмнэлгүүдтэй хамтран ажиллах гэрээг жил бүр байгуулж, төсвөө баталдаг. Баталсан гэрээгээ үргэлж зөрчиж байдаг. Тухайлбал, 2025 онд танасан төсвийн хүрээнд тусламж үйлчилгээ үзүүлэх ажиллах төлөвлөгөө гарган, 12-р сар хүртэл санхүүжилт авахаар гэрээ байгуулсан. Гэвч 2025 оны 10-р сараас эхлэн хувийн эмнэлгүүдэд олгох ЭМДС-гийн санхүүжилтийг зогсоосон тул эмнэлгүүдийн хэвийн үйл ажиллагаа доголдож, зарим эмнэлэг хаалгаа барихад хүрчээ.

Хувийн эмнэлгүүд улсын хэмжээнд 18 мянга гаруй эмч, сувилагч, эмнэлгийн мэргэжилтэн ажиллаж, улсын эмнэлгийн ачааллын 30-40 хувийг хуваалцдаг. Хувийн эмнэлгүүд хүний нөөц, тоног төхөөрөмжөө худалдаж авч, байраа түрээслэн үйл ажиллагаа явуулдаг. Тоног төхөөрөмж авахдаа банкнаас зээл авсан. Иргэдэд үзүүлсэн тусламж үйлчилгээний төсөв даатгалын сангаас орж ирэхгүй болсноор эмнэлгүүд банкны зээлээ төлөх, эмнэлгийн бусад зардлууд болон тусламж үйлчилгээг үзүүлэх боломжгүй болж буй тул Монгол Улсын Засгийн газар, ЭМЯ болон ЭМДЕГ-т таван заалт бүхий шаардлага хүргүүлж байгаагаа танилцуулав.