Шинэ жилийн баяр болох гэж буйтай холбоотойгоор нийслэлийн замын хөдөлгөөний ачаалал нэмэгдсэн. Иймд өнөөдрөөс улсын дугаарын тэгш, сондгой тоогоор хязгаарлаж хөдөлгөөнд оролцуулахаар болсон тухай Тээврийн цагдаагийн албанаас мэдээлээд байв.
Харин Хууль зүй дотоод хэргийн сайд Б.Энхбаяр “Дугаарын хязгаарлалттай холбоотойгоор Тээврийн цагдаагийн албанаас хийсэн мэдээллийг нягтлахад, дугаарын хязгаарлалт хийх тухай Нийслэлийн Засаг даргын захирамж гарч Тээврийн цагдаад албажиж ирээгүй бөгөөд хотын захиргаанаас амаар өгсөн чиглэлийн дагуу Тээврийн цагдаагийн алба мэдээлэл хийсэн байна.
Энэ тухай Хууль зүй, дотоод хэргийн сайд, Цагдаагийн ерөнхий газрын даргад мэдэгдээгүй байсан. Хариуцлага яригдана. Албажаагүй, ам шийдвэрээр иргэдийн эрхийг хязгаарлахгүй байх талаар Цагдаагийн ерөнхий газарт үүрэг өгөв” гэж өөрийн албан ёсны цахим хуудсандаа бичжээ.
Өөрөөр хэлбэл, тэгш, сондгойгоор хязгаарлаж хөдөлгөөнд оролцуулах шийдвэр албажаагүй тул хэрэгжихгүй аж.
