Эрүүл мэндийн сайд Ж.Чинбүрэн Сүхбаатар дүүргийн эрүүл мэндийн төв, Сэлбэ эмнэлгийн үйл ажиллагаатай танилцаж, тулгамдаж буй асуудлуудыг шийдвэрлэхээр санал солилцжээ.
Сүхбаатар дүүрэг нь 142,4 мянган хүн амтай, 20 хороо, 16 Өрхийн эрүүл мэндийн төвтэй. Хүн амын ихэнх нь буюу 32.6 хувийг 0-15 насны хүүхэд эзэлдэг. СБДЭТөв нь хойд, урд, төвийн 4 бүсэд салбар эмнэлэг, лабораторитойгоор үйл ажиллагаа явуулж байна.
Тус төвийн харьяа хойд бүсийн Сэлбэ Нэгдсэн эмнэлэг 2024 оны 10 дугаар сард ашиглалтад орсон бөгөөд 153 эмч, ажилтантай, эмнэлгийн мэргэшсэн 21 төрлийн тусламж үйлчилгээ үзүүлжээ.
Тухайлбал, сэргээн засах, зүрх судас, нийгмийн эрүүл мэнд, мэдрэл, нүд, чих хамар хоолой, дотор, дүрс оношилгооноос гадна “Өсвөр насны хүүхдийн уян дурангийн оношилгоо”, амьсгалын хеликобактер тоолох шинжилгээг хийж эхэлсэн байна.
Сэлбэ эмнэлэг нь нэг жилийн хугацаанд Сүхбаатар дүүрэг төдийгүй Чингэлтэй, Баянзүрх дүүргийн алслагдсан хороодын нийт 133,293 хүнд тусламж үйлчилгээ үзүүлжээ.
Үүнээс 97 мянган амбулаторийн үзлэг, 35 мянган оношилгоо хийжээ. Сэлбэ эмнэлгийн Дүрс оношилгооны төвд КТГ-ын оношилгоогоор улаан хоолой, ходоод гэдэсний уян дуран, эмэгтэйчүүд, зүрх судас, хөх, бамбайн хэт авиан шинжилгээ, рентген зэрэг 10 төрлийн оношилгоо хийж, нийт 822 үйлчлүүлэгч хамруулснаас эмгэг өөрчлөлттэй 27 тохиолдлыг шинээр илрүүлсэн байна.
Мөн дурангийн оношилгоонд 3502 хүн хамруулснаас өөрчлөлт илэрсэн 156, эмгэг судлалын шинжилгээнд 76-г тус тус хамруулсан аж.
Томуу, томуу төст өвчний дэгдэлтийн үед нийт 2305 хүүхэд хэвтэн эмчлүүлсэн ба 5775 хүүхэд яаралтай тусламжаар хүлээн авчээ.
Үүнээс 5116 нь амьсгалын замын цочмог хүнд халдварын шалтгаантай байсан байна. Томуугийн дэгдэлтийн үед ачаалал нэмэгдсэн хэдий ч нэг ч хүхэд коридорт хэвтүүлээгүй амжилттай давж байна гэдгийг тус эмнэлгийн даргын албан үүргийг түр орлон гүйцэтгэгч Б.Баярмаа танилцууллаа.
12 дугаар сар гарснаас хойш яаралтай тусламжийн тасагт 324 хүүхэд хандсан бөгөөд томуугийн шалтгаант үзлэг болон хэвтэн эмчлүүлэх хүүхдийн тоо буурсан байна.
Эх сурвалж: Эрүүл мэндийн яам
