Монгол Улсын эрчим хүчний сүлжээний найдвартай байдлыг бэхжүүлэх, сэргээгдэх эрчим хүчийг нэвтрүүлэх суурь нөхцөлийг бүрдүүлэх зорилгоор Япон Улсын Засгийн газраас 500 сая иен хүртэлх үнийн дүн бүхий буцалтгүй тусламж олгохоор боллоо.

Элчин сайд М.Игавахара болон Монгол Улсын Сангийн Сайд Б.Жавхлан нар өнөөдөр төслийн ноот бичигт гарын үсэг зурав.

Монгол Улс дотоодын цахилгаан эрчим хүчний хэрэгцээний ойролцоогоор 20 хувийг хөрш орнуудаас импортоор хангаж үлдсэн дотоодын хэрэглээг  нүүрсний цахилгаан станцуудад тулгуурлан нийлүүлдэг. Энэ нь эрчим хүчний шилжилтийг яаралтай хэрэгжүүлэх шаардлагатай, тулгамдсан асуудал болоод буй.

Эрчим хүчний үйлдвэрлэлийн хэмжээгээрээ хэлбэлзэл ихтэй сэргээгдэх эрчим хүчийг нэвтрүүлэхийн тулд цахилгаан сүлжээнд үзүүлэх нөлөөг шинжлэн үнэлэх тоног төхөөрөмж болон уг нөлөөг зохицуулах тоног төхөөрөмж зайлшгүй шаардлагатай байдаг.

Гэвч одоогийн байдлаар эдгээр тоног төхөөрөмжийн хүрэлцээ хангалтгүй байгаа нь Монгол Улсын цахилгаан эрчим хүчний сүлжээний дэд бүтцийн тогтвортой ажиллагаа, засвар үйлчилгээнд саад учруулж байна.

Төслийн хүрээнд цахилгаан эрчим хүчний сүлжээний дэд бүтцийг найдвартай бөгөөд тогтвортой ажиллуулахад шаардлагатай тоног төхөөрөмжүүдийг (хөдөлгөөнт трансформаторын туршилтын автомашин, эрчим хүчний сүлжээний ажиллагааг тухайн цаг мөчид нь хянах бүрэн дижитал симулятор зэрэг) нийлүүлнэ. 

Ингэснээр Монгол Улсын цахилгаан эрчим хүчний сүлжээний ашиглалт, засвар үйлчилгээний чадавхыг бэхжүүлэхийн зэрэгцээ, сэргээгдэх эрчим хүчийг нэвтрүүлэх суурь нөхцөлийг бүрдүүлж, эрчим хүчний шилжилтийг эрчимжүүлэхэд хувь нэмэр оруулна хэмээн найдаж байгааг Япон Улсын элчин сайдын яамнаас мэдээллээ.