Аймгийн Засаг дарга Г.Өнөрбаяр Цагаанхайрхан сумын Засаг дарга Л.Бат-Амгалан, Алдархаан сумын Засаг дарга А.Мөнхсайхан нарын хамт Улиастай-Цагаанхайрхан чиглэлийн авто замын ажлын явцтай танилцав.
Уг төслийн гүйцэтгэгч “Чайна Жиангсу интернэйшнэл экономик энд техникал кооперэйшн” компанийн гүйцэтгэх захирал Хао Хун Шинтэй уулзаж, ажлын нөхцөл байдлыг үзэж, орон нутгаас шалтгаалж буй асуудлуудыг шийдвэрлэхээр ярилцав.
2025 оны 5 дугаар сард эхэлсэн уг төслийн хүрээнд нийт 40,2 км авто зам баригдах ба Яруугийн голд 134м, Богдын голд 176м, Ширээгийн голд 134м, Шороотын хоолойд 29м буюу нийт 4 байршилд 450м төмөр бетон гүүр тавигдаж байна.
Мөн 7 байршилд авто зогсоол, 11 байршилд уулзвар гарц, 105 байршилд ус зайлуулах хоолой хийгдэж байна.
Одоогоор Алдархаан талаас 10 км замыг асфальтаар хучихад бэлэн болгосон ба энэ оны 11 дүгээр сар гэхэд 10 орчим км замыг хучиж, бүх гүүрийн тулгуур багануудыг цутгаж, дам нуруу тавих, ус зайлуулах хоолойнуудыг 100 хувь дуусгахаар төлөвлөж байгаагаа гүйцэтгэгч компаний удирдлагууд танилцууллаа.
Уг төслийг эхлэх үед аймгийн Засаг дарга Г.Өнөрбаяр хүсэлт гаргасны дагуу Завхан аймгаас туслан гүйцэтгэгчээ сонгож, 70 гаруй иргэнийг ажиллуулж, хүнсний хэрэгцээний тодорхой хувиа хангаж байна гэв.
Зам барих ажлын үеэр урд чиглэлийн сумд руу зорчиход саадгүй байхаар туслах замуудыг гаргаад байна.
Ирэх оны 8 дугаар сард авто зам бүрэн ашиглалтад орж Улиастай-Цагаанхайрхан сум засмал замаар холбогдоно.
