Нийслэлд өвөлжилтийн бэлтгэл ажлын хүрээнд зам цэвэрлэгээний 432 тусгай зориулалтын машин, давс, бодис цацах 96 машины бэлэн байдлыг хангаж, 16 мянган тонн давс, бодис нөөцөлжээ.

Мөн нийслэлийн хэмжээнд 80.2 км инженерийн шугам сүлжээ, 132 км авто замыг шинэчилж байна. Үүнээс 18.7 км дулаан, 30 км цахилгаан, 19.1 км борооны ус зайлуулах, 9.8 км ус хангамж, ариутгах татуургын шугам сүлжээний ажил үргэлжилж байгаа аж.

Түүнчлэн нийслэлийн төвийн зургаан дүүргийн 102,892 гэрэлтүүлгийн хэвийн ажиллагааг хангаж, үерийн хамгаалалтын байгууламжийн 24 байршлаас 34 мянга гаруй шоо метр лаг, хагшаасыг цэвэрлэжээ.

Өвөлжилтийн бэлтгэл ажлын хүрээнд дулаан хангамжийн найдвартай ажиллагааг хангах, цахилгаан түгээх сүлжээний урсгал болон их засварын ажлуудыг дуусгах ажил үргэлжилж байна. Харин өмчлөл, эзэмшил нь тодорхойгүй ус, дулааны инженерийн шугам сүлжээний засвар, үйлчилгээ тулгамдсан асуудал болж байгааг холбогдох албаныхан онцоллоо.

Нийслэлийн Засаг дарга Б.Пүрэвдагва инженерийн хангамжийн байгууллагууд, хэрэгжүүлэгч агентлагууд болон есөн дүүргийн удирдлагуудад өвөлжилтийн бэлтгэл, иргэдийн аюулгүй байдлыг хангах, угаарын хийн эрсдэлээс сэргийлэх ажлыг чанартай зохион байгуулах үүрэг өгчээ.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс