Элсэлтийн ерөнхий шалгалт дууссаны дараагаар аав ээжийгээ дагуулан, хавтас бичиг баримт сугавчилсан хүүхдүүд Боловсролын үнэлгээний төвийг зорьж эхэлдэг. Мэдээж тэд элсэлтийн ерөнхий шалгалттай холбоотой асуудлаар энэ байгууллагыг зорьж санал гомдлоо илэрхийлэхээр яваа нь лавтай. Үнэхээр ч Боловсролын Үнэлгээний төвд ЭЕШ-тай холбоотой өргөдөл, гомдлыг шийдвэрлэх 5-7 хүний бүрэлдэхүүнтэй комисс ажиллаж эхэлжээ. Шалгуулагч шалгалтын дүн, оноотой санал нийлэхгүй байгаа болон шалгалтын дэвтэр, хариултын хуудастай холбоотой өргөдлөө бичгээр гаргаж, шалгалтын дүн, шалгуулагчдын оноо зарласнаас хойш ажлын таван өдөрт багтаан Боловсролын үнэлгээний төвд ирүүлэх ёстой аж. Өргөдлийг хуулийн хугацаанд багтаан шийдвэрлэж хариуг нь бичгээр өгөх юм байна. Шалгуулагчийн буруутай үйлдлээс шалтгаалсан зөрчилтэй холбоотой өргөдлийг хүлээн авч шийдвэрлэх боломжгүй учир шалтгаанаа тодорхой заагаагүй болон буцах хаяггүй өргөдлийг хүлээн авахгүй юм байна шүү.