Сонгуулийн ерөнхий хорооноос Монгол Улсын Ерөнхийлөгчийн сонгуулийн дахин санал хураалтыг ирэх сарын 7-нд зохион байгуулах шийдвэр гаргасан. Үүнтэй холбогдуулан аймаг, орон нутагт их, дээд сургууль, коллежийн элсэлтийн бүртгэл, ур чадварын шалгалт, хуваарь сонголтын үйл ажиллагааг ирэх сарын 1-4-ний хооронд шуурхай зохион байгуулах чиглэлийг БСШУСЯ-ны Бодлогын хэрэгжилтийг зохицуулах газрын дарга М.Мөнхбаатар Монголын их, дээд сургуулиудын консорциум, хувийн их, дээд сургуулиудын холбоонд хүргүүлжээ.

Уг нь, оюутан элслүүлэх үйл ажиллагааг ирэх сарын 2-ноос эхлүүлж, ирэх сарын 7-ны өдөр нэмэлт хуваарь сонголтоор өндөрлөх байсан юм. Ямартай ч дээрх  чиглэлд ирэх сарын 5-наас 7-ны өдрийг дуустал элсэлт, хуваарь сонголтын ямар нэгэн үйл ажиллагааг явуулахгүй байх зохион байгуулалтын арга хэмжээг авч ажиллах, хөдөө орон нутгаас аймгийн төвд ирж хуваарь сонголт хийх хүүхдүүдийн аюулгүй байдлыг хангах үүднээс баталгаатай, бүрэн бүтэн тээврийн хэрэгслээр зорчих сэрэмжлүүлгийг эцэг, эх, асран хамгаалагч нарт хүргэхийг үүрэгджээ.