Хичээлийн шинэ жилийн баярын өдөр нөгөөдөр тохионо. Жил жилийн энэ өдөр Монгол Улс даяар цэцэрлэг, ерөнхий боловсролын сургууль, их дээд сургуулиуд мөнгөн хонхоо дуугарган шинэ хичээлийн жилээ эхлүүлдэг билээ. Их дээд болон ерөнхий боловсролын сургуулиуд элсэгчдээ бүртгэж, цэцэрлэгүүд багачуудаа сугалаагаар тодруулаад дууссан. Тиймээс энэ жил хэдэн хүүхэд цэцэрлэгт хамрагдаж, хэчнээн залуус оюутны ширээний ард сууж, хэд нь ерөнхий боловсролын сургуульд сурах талаарх тоон мэдээллийг хүргэе.

2017-2018 онд ерөнхий боловсролын 798 сургуульд нийт 575,879 суралцагч суралцах аж. Харин нэгдүгээр ангид 73,545 хүүхэд элсэн суралцах бөгөөд өнгөрсөн онтой харьцуулбал хүүхдийн тоо 11300-гаар нэмэгджээ.

Улсын хэмжээнд төрийн болон төрийн бус өмчийн нийт 1422 цэцэрлэг ажиллах юм байна. Төрийн 877 цэцэрлэгт 209,568, төрийн бус өмчийн 545 цэцэрлэгт 33,864 хүүхэд хамрагдах нь. Энэ жил сургуулийн өмнөх боловсролын хамран сургалтыг улсын хэмжээнд 0.6 пунктээр нэмэгдүүлж 81.5 хувьд хүргэсэн учир 252,753 хүүхэд хамрагдахаар болсон нь энэ юм байна. Өмнөх онтой харьцуулбал 9321 хүүхдээр нэмэгдсэн гэсэн үг.

Энэ жил төрийн бус өмчийн их, дээд сургууль, коллеж шинээр нэмэгдээгүй байна. Улсын хэмжээнд нийт 96 их, дээд сургууль ажиллах бөгөөд эдгээрт 150000 мянга гаруй оюутан суралцах төлөв бий аж. Их, дээд сургуульд суралцагчдын тоо өнгөрсөн онтой харьцуулахад 7100 орчмоор буурсан байна.