БСШУС-ын сайд Ц.Цогзолмаа өөрийн цахим хуудаснаа ийн бичжээ.
“Өнгөрсөн 7 хоногт Ховдод 3 өдөр ажиллаад ирлээ. 3 сумаар орлоо. Оюутны хөгжлийн зээлийн талаар мэдэж байгаа хүн бараг алга. Хүү маань онц сурдаг учраас 2 жилийн 15% хүүтэй тэтгэврийн зээл авч сургалтынх нь төлбөрийг төлсөн гэх эмээтэй таарлаа.
- Оюутны хөгжлийн зээл гэж гарсан шүү дээ, ямар ч хүүгүй. Онц сурдаг хүүхдэд бол ямар ч асуудалгүй олгогдох ёстой.
- Өнгөрсөн жил тийм зээл хөөцөлдсөн чинь барьцаа энээ тэрээ гээд олон юм шаардаад байсан гэсэн шүү дээ. Тэр нь дийлдэхгүй юм билээ...
- Энэ жилээс ямар ч хүүгүй, барьцаагүй болчихсон шүү дээ...
Бид хоёрын дунд нэг ийм яриа боллоо. Эмээ баахан ерөөл тавьж дараа жилээс ач хүүгээ оюутны хөгжлийн зээлд хамруулах болоод салсан. Ийм байдал ялангуяа хөдөө орон нутагт их түгээмэл байна. Тиймээс Ховд их сургууль дээр ажиллахдаа сайн сурдаг оюутнуудаа энэ зээлийн хөтөлбөрт хамруулах талаар маш сайн анхаарал тавьж ажиллах талаар үүрэг өгсөн. Эндээс явахаасаа өмнө Зээлийн сангийн даргадаа ч ийм үүрэг өгөөд явсан. Энэ 7 хоногт их, дээд сургуулийн удирдлагуудтай уулзаж энэ талаар үүрэг өгье гэж төлөвлөж байна.
Ер нь бол энэ Засгийн газрын гаргасан түүхэн том шийдвэр бол Оюутны хөгжлийн зээлийг ХҮҮГҮЙ, БАРЬЦААГҮЙ болгосон явдал гэж боддог. Тавигдах хамгийн том шаардлага, шалгуур нь сурлагын дүн. Оюутан бол голч оноо 2,8-аас дээш, анхлан элсэгч бол ЭЕШ-ын оноо 600-гаас дээш байх. Төгсөөд зээлээ заавал эргэж төлнө. Төлөхгүй бол найдваргүй зээлдэгч болно. Журам нь ийм. Өөрөөр хэлбэл, сайн сурлагатай оюутныг бодлогоор дэмжсэн, тэднийг хариуцлагажуулсан сайн хөтөлбөр гэж боддог доо” гэжээ.
