Монголын хамгийн том арилжааны банк гэсэн утгаар нь манай байгууллага тус банктай хамтран ажилладаг. Хоёр байгууллагын хамтын ажиллагаа, итгэлцлээ бодоод аливаа зүйлд бидний зүгээс байнга хүлээцтэй хандаж байдаг юм. Гэвч энэ удаад “Голомт”-ийн үйлчилгээ арай ч дэндүү хүнд сурталтай бас ямар  их чирэгдэлтэйг өөрийн биеэр мэдэрлээ. Хэрвээ өөрт маань тохиолдоогүй бол бусдын амнаас энэ тухай сонссон бол үнэмшихгүй л байлаа. Ажлын байртай маань ойрхон болохоор 11 дүгээр хорооллын “Номин” дэлгүүрийн үүдэнд байх “Голомт” банкны “АТМ” -ээр үйлчлүүлэх шаардлага надад цөөнгүй гардаг. Гэвч яг үнэндээ энэ машин нь ажиллахаасаа ажиллахгүй нь их учраас хажууд нь байгаа Худалдаа хөгжлийн АТМ-д 100+500 төгрөг төлөн мөнгөө авдаг. Гэхдээ үүнд гомдол тавиад сүйд болоод байдаггүй. Тэгэсгээд л өнгөрдөг. Өнгөрсөн жилийн арванхоёрдугаар сарын 27-ний өдөр “Номин”-гийн АТМ-ээс мөнгө авлаа. Өглөө эрт байсан учраас картаа хийж мөнгөнийхөө дүнг хийчихээд тортой зүйлээ хайрцагт хийх санаатай хайрцагны дугаар авчихаад эргэтэл мөнгө маань байдаггүй. Эргүүлээд татчихаж дээ гээд картан дээр байгаа 36-тай утас руу залгалаа. Үйлчилгээний ажилтан залуу уриалгахан гэгч нь “Үзээд өгье. Эргээд танд мэдэгдэе” гэв. Эргээд залгахдаа “Та авчихсан байна гэж гарч ирж байна даа” хэмээн мэлзлээ. Би нэгэнт тэр миний дэргэд байгаагүй учраас “аваагүй” гэдгээ  хэлэхээс өөр батлах арга байдаггүй. Учир ядаад “танайх чинь энэ картныхаа машиныг хянадаг камер энэ тэр байдаг биз дээ. Тэрийгээ шүүгээд үзчихэж болохгүй юу” хэмээн хэллээ. Гэтэл “ Болно л доо. Та эхлээд наад дүүргийнхээ цагдаагийн хэлтэст мэдэгдээд өргөдлөө өг. Тэр өргөдөл чинь манай дээр ирэхээр бид камераа шүүгээд...” гээд Шоргоолжны үлгэр шиг юм ярилаа. Яг үнэндээ 100 мянган төгрөг авах гэж тэрнээсээ илүү зардал гаргах нь хэмээн төвөгшөөсөн мань мэт нь сонсоод л “За одоо орхихоос доо” гээд л хаяв. Гомдолтой л байсан л даа. Гэхдээ адгийн зарга арав хоног гэж...

Саяхны нэг өдөр картнаасаа мөнгө авах санаатай ахиад л АТМ рүү гүйв. Гэтэл нөгөө 100 мянган төгрөг маань орчихож. Овоо доо “Голомт” хэмээн бодсоор өнгөрлөө.

Өнгөрсөн баасан гаригт 11 дүгээр хорооллын АТМ орлоо. Машин нь ажилладаггүй ээ. Ойрхныг нь гэнэт санаад “Голомт”-ын салбараар орж үйлчлүүлэв. Таны нууц дугаар орсонгүй ахиад хийнэ үү хэмээн теллер охин хэлж, би ч юу ч бодсонгүй пин кодоо хийлээ. Гэтэл маргааш нь буюу бямба гаригт хүнсээ цуглуулах гэж яваад картаа хоосорсныг анзаарав. Авсан, үрсэн мөнгөө бодоод бодоод картаа хэрхэн хоосорсныг ойлгосонгүй. Ирээд эхнэрээс асуувал теллер хэдэн удаа картыг чинь уншуулсан бэ хэмээн асууж байна. Хоёр гэтэл тэгээд мөнгийг чинь гөвчихөж хэмээн бүүр мэддэг царайтай хэлж байна. Үнэхээр нөгөө найдвартай, үйлчилгээ сайтай гэгддэг банкиндаа нэг сарын хугацаанд хоёр удаа “гомдоход” хүрэв.

 Уур ч хүрэх шиг. Хэрвээ би картандаа мөнгө байгаа гэж бодоод тэр чигтээ хөдөө гараад давхичихсан бол яах уу. Амьд хүн аргатай гэж гэр орон руугаа утасдаад мөнгө шилжүүлэх л байх. Гэвч энэ чирэгдэл, хайран цаг завын маань хохирлыг хэн барагдуулах хэрэг вэ. Даваа гаригийн өглөө банкин дээрээ очоод учир байдлаа хэлбэл “Аан ийм программын алдаа гараад байгаа юм аа” хэмээн ахлах ажилтан бүсгүй тоож байгаа шинж алга. Байдаг л зүйл гэсэн байдлаас хандлаа. Өргөдөл хэмээн алгын чинээ цаасан дээр картын дугаар энэ тэрээ бичээд ахиад л 30-40 минут хүлээж, учир байдлаа тодруулав. Яг үнэндээ надад банкин дээр зогсох 30 минут ч хайран байна.  Теллер охин утсаар ярьж, компьютерээ цохисоор “За таны мөнгө 30-40 минутын дараа орох байх аа” хэмээн хэлээд карт сарвайлаа.
Гэвч өнөөдрийг хүртэл өнөө мөнгө байдаггүй. Өнөө орой маргааш гэсээр бараг баасан гаригтайгаа золгож байна. Хамгийн хачирхалтай нь картанд байгаа мөнгө бол банкинд хадгалуулсан хадгаламж биш. Би өөрийнхөө мөнгийг хэзээ ч юунд зарцуулахад бэлэн байдаг. Харамсалтай Голомт миний мөнгийг хоёр дахь удаагаа ийн багадаа долоон хоногийн хугацаатай “ашиглаж” байгаа нь өөрийн эрхгүй үйлчлүүлэгчийнхээ картанд байгаа мөнгийг энэ банк эргэлдүүлээд байна уу гэж хардахад хүргэв. Хэрвээ тийм бол Шударга өрсөлдөөн хэрэглэгчийн төлөө газарт ховлохоос өөр яалтай. Яаралтай шалгаж, учир байдлыг нь тодруулж хамгийн гол үйлчлүүлэгчээ гомдоож байгаа шалтгаан, үүнээс гарах зардал чирэгдлийг хэрхэн барагдуулах вэ гэдэгт анхаарч өгнө үү.

 Хамгийн гол нь аливаа үйлчилгээний хувьд сонголт арвин болчихсон энэ цаг үед үйлчилгээний ажилтнууд, байгууллагууд маш хариуцлагатай ажиллаж, нэг ч гэсэн үйлчлүүлэгчээ алдах эрхгүй байхсан. Үйлчлүүлэгч та ч мөн шуурхай найдвартай хэрэглэгчийг л сонгох нь гарцаагүй. Гэтэл “Голомт”-ын ийм юм болдог л юм гэсэн байдлаар хандаж байгаа нь гомдмоор...