Хүн төрөлхтөн эрүүл, гоо сайхан, мөнх залуу байхын тулд юу эсийг туршдаг билээ. Бие дэх хорт муу зүйлийг гаргахын тулд хануур хорхойд хазуулахаас эхлээд янз бүрийн арга хэрэглэдэг ч саяхныг хүртэл эмгэн хумсыг хэрхэн гоо сайханд ашигладгийг мэддэггүй л байв. Тэгвэл Японы гоо сайхны мэргэжилтнүүд эмгэн хумсыг нэгэн төрлийн арьсны эмчилгээ болгон ашигладаг болжээ. Токиогийн “Clinical” салонд эмгэн хумсаар хийх 60 минутын эмчилгээг үйлчлүүлэгчиддээ санал болгож байна. Энд үйлчлүүлэгчийнхээ нүүрийг цэвэрлэсний дараа амьд эмгэн хумснуудыг нүүрний арьсан дээр нь дураар нь явуулах бөгөөд үүгээрээ үхэжсэн арьсыг гуужуулан, гэмтэлтэйг нь эрүүлжүүлэн толигор чийглэг болгодог гэж тайлбарлаж байна. Эмгэн хумсны биед хүчирхэг уураг, антиоксидантууд агуулагддаг нь арьсанд сайнаар нөлөөлдөг гэнэ. Мөн нарны хэт ягаан туяанд хордож гэмтсэн арьсыг эмчлэх шид ч эмгэн хумсанд байдаг аж. 
Эмгэн хумс арьсан дээр явуулахаас гадна нэлээд хэдэн төрлийн маск, массаж дагалдуулдаг энэ эмчилгээний нэг удаагийн төлбөр 200 шахам ам.доллар гэнэ. Япончуудын хэлж буйгаар эмгэн хумсыг арьсанд сайн болохыг эртний Гиппократын үед хүртэл мэдэж байсан бөгөөд түүнийг сүүтэй хольж арьсны үрэвслийг эмчилдэг аргатай байсан гэнэ. 
