Засгийн газраас хийж хэ­рэг­жүүлж буй бүтээн бай­гуулалтын ажлыг долоо хо­ног бүрийн даваа гарагт сэтгүүлчдэд мэдээлдэг уламж­лалтай болсон. Өнгөрсөн долоо хоногт хойшлогдсон “Бүтээн байгуулалтын цаг” өчигдөр хоёр долоо хоногийн ажлын явцын талаар та­нил­цуулснаар эхэллээ. Ерөн­хий сайд болон салбарын сайдууд амарч байгаа учраас уг мэдээллийг Шадар сайд Д.Тэрбишдагва удирдан явуу­лав. Эхний мэдээллийг Зам тээв­рийн дэд сайд өглөө. Гашуунсухайт-Ухаахудаг чиг­лэлд тавьж байгаа төмөр замын ажил өнгөрсөн хоёр долоо хоногийн хугацаанд өм­нө­хөөсөө нэг хувиар ахи­сан гэнэ. Төмөр зам барих ажилд туслан гүйцэтгэгчээр есөн компани ажиллаж буй. Энэ онд зургаан аймгийг нийслэлтэй хатуу хучилттай замаар холбохоор болсон. Эл ажлын хүрээнд Баянхонгорыг Улаанбаатартай холбосон замын ажил 97.8 хувьтай байгаа бөгөөд ирэх сарын эхээр улсын комисст хүлээлгэж өгөх юм байна. Харин Дорнодын чиглэлийн замын ажил 33.3 хувьтай байгаа гэсэн. Өнгөрсөн долоо хоногт Ерөнхий сайд тус чиглэлийн замын ажилтай танилцаж, 143 км зам тавих ажилд санхүүгийн асуудал хүндрэлтэй байсныг шийдвэрлэж өгсөн байна. Өөрөөр хэлбэл, Хөгжлийн банкнаас мөнгийг нь шилжүүлэхээр болсон ч өнөөг хүртэл мөнгийг нь шийдээгүй байгаад Шадар сайд багагүй бухимдан “Ерөнхий сайд газар дээр нь очиж асуудлыг шийдээд байхад та нар хойрго хандаж байна. Нэн даруй хөрөнгө мөнгийг нь шийдэж өгөө­рэй. Нэг компаниас болж, ажил гацах ёсгүй” гэв. Түүнч­­лэн Хөвсгөл, Дундговь, Өмнө­говь, Дорноговь айм­гийг нийслэлтэй хатуу ху­чилт­тай замаар холбох ажил гра­фикийн дагуу явагдаж байгаа гэсэн.
Харин Барилга, хот байгуулалтын яамныхан орон сууцны өвлийн бэлтгэлийг хангуулах чиглэлээр ажиллаж байгаа аж. Өнөөдрийн байд­лаар өвөлжилтийн бэлтгэл 29.6 хувьтай буй гэсэн. Энэ онд инженерийн шугам сүлжээний 56 ажил хийхээс 12-ыг нь гүйцэтгэж байгаа бол 16 ажлын гүйцэтгэгчийг шалгаруулахаар тендер зарлаад байна. Засгийн газраас хөнгөлөлттэй зээлээр иргэдэд орон сууц олгох ажил хэвийн явагдаж байгаа аж. Харин байрны ам.метрийн үнэтэй холбоотой гомдол санал багагүй ирж буй гэсэн.  
Үйлдвэр, хөдөө аж ахуйн салбарт ямар ажил өрнөж буй талаархи мэдээллийг салбарын дэд сайд Ц.Туваан өглөө. Манай улс энэ жил 278 мянган га талбайд улаан буудай тариалжээ. Мөн 13.8 мянган га-д төмс, 7.8 мянган га-д хүнсний ногоо, 9.0 мянган га-д тэжээлийн ургамал тариалсан бай­на. Уринш хийсэн газарт хо­гийн ургамал ургасан уч­раас одоогоор нэгдүгээр шат­ны уринш хийгээд байгаа гэ­сэн. Японы Засгийн газрын буцалтгүй тусламжаар Төв аймгийн Угтаалцайдам суманд үр тариа хадгалах элеватор барьсаныг ирэх сард хүлээж авах аж. Ингэснээр манай улс 146 мянган тонн үр тариа нөөцлөх байр савтай болж буй юм байна. Үүнээс гадна орон нутагт хүнсний ногоо хадгалах зоорийг улсын төсвийн дэмжлэгтэйгээр барьж байгаа гэнэ. Түүнчлэн Ховд аймгийн Буянт сумын Буянт гол болон Баянхонгор, Төв аймагт услалтын систем барьж байгаа тухай мэдээллийг ҮХАА-н дэд сайд Ц.Туваан өгөв. Энэ жил улсын хэмжээнд 14.6 сая толгой төл хүлээж авсан нь сүүлийн таван жилд гараагүй тоо гэнэ. Тиймээс мал сүрэг өсч байгааг хэлж байсан юм. 18 аймагт 6.5 тэрбум төгрөгөөр 407 худаг гаргахаар тендер зарлаж, одоогоор 120 гаруй худаг ашиглалтад оруулаад байгаа аж. Үүнээс гадна тус яаманд “Чингис” бондоос 253 тэрбум төгрөг өгчээ. Тэд ноос, ноолуур, оёдол, өвлийн хүлэмж, сүү сүүн бүтээгдэхүүний салбарт ашиглах юм байна. Дээрх салбаруудад тоног төхөөрөмж худалдаж авах чиглэлээр захирамж гарсан учраас төслийн нэгжүүд байгуулагдан ажиллаж байгаа аж.
Харин Эрчим хүчний яам­ны­хан өвөлжилтийн бэлтгэ­лээ хангаад тун завгүй бай­гаа гэнэ. Засгийн газрын 118  дугаар тог­тоолын дагуу нэлээд аж­лыг хийж буй гэсэн. Амга­лан дулааны цахилгаан стан­цын газрыг бүрэн чөлөөлж дуу­саагүй байгаа. Уг ажилд энэ жил 5.1, ирэх онд 20 тэрбум төгрөг зарцуулахаар тө­сөвт тусгахаар болжээ. Тэнд томоо­хон гурван аж ахуйн нэгж байгаа учир газар чөлөө­лөх үнэл­гээг Сангийн яамнаас хий­­сэн байна. Гэрээ ёсоор ирэх арванхоёрдугаар сард уг станцын эхний блокыг ашиг­лал­тад оруулах ёстой байсан ч зарим асуудлаас болж хойшлогдсон гэнэ. Станцын зураг төслийг Харбин хотод хийлгэж байгаа бөгөөд үүний дараа Монголын тал баталгаажуулах юм байна. Гүй­цэт­гэгчээр шалгарсан ком­па­ни ч нарийв­чил­сан ТЭЗҮ-гээ батлуулаагүй бай­гаа аж. Үүнээс гадна ТЭЦ-IV-ийг 100 МгВ-аар өргөтгөх ажил явагдаж байгаа бөгөөд ОХУ-ын тал тогтоолд багтсан үнэ өртгөөр нийлүүлэхээ мэ­дэгд­жээ. Харин ТЭЦ-III-ыг 50 МгВ-аар өргөтгөх ажил 65 хувьтай байгаа бөгөөд ирэх есдүгээр сарын эхээр то­ног төхөөрөмжөө хил дээр авчрахаар гүйцэтгэгч ком­панийнхан тохиролцсон байна.    
Үүний дараа Эдийн зас­гийн хөгжлийн дэд сайд О.Чулуун­бат улсын төсвийн болон бондын хөрөнгөөр сан­хүүжиж байгаа ажлуудын та­лаар мэдээлэл өгсөн юм. Ул­сын хэмжээнд 1.5 их наяд төг­рөгийн төсөлд санхүүжилт ол­гох ёстой ч эхний хагас жи­лийн байдлаар 880 тэр­бум төгрөгийн санхүүжилт олго­хоор төлөвлөжээ. Гэтэл одоо­гийн байдлаар компаниуд 204 тэрбум төгрөгийн санхүүжилт аваад байгаа аж. III, IV улиралд багтаан төслүүдээ яаравчлахгүй бол бондын мөнгийг тэврээд хэвтээд байгаагаас өөрцгүй болон хэмээн О.Чулуунбат дэд сайд онцолж байв. Сайдуудын мэдээллийн дараа Шадар сайд Д.Тэрбишдагва “Гацаад байгаа ажлаа яаравчил. Урин дулаан цаг дуусах нь. Хугацаа богинохон учраас цаг нартай уралдан ажлаа хийх ёстой. Дараагийн бүтээн байгуулалтын цагаар тодорхойгүй байгаа бүхий л асуудлуудаа тодорхой болго” хэмээн үүрэг болголоо.