УИХ-ын гишүүн Ц.Шинэбаярыг булган сүүлтэй гэж МАХН-ын гишүүд ам сайтай байгаа гэдэг юм билээ. Яагаад гэвэл тэрээр анх МАН-аас МАХН руу урвах “хөтөлбөр” хэрэгжүүлсэн. Түүний энэхүү үйл хэргийг УИХ-ын гишүүн Д.Тэрбишдагва, Ч.Улаан, О.Чулуунбат нар үргэлжлүүлэхээр болж МАН-ын батлахаа хүлээлгэн өгч, МАХН-ын гишүүнчлэлээ сэргээхээр болсноо албан ёсоор зарлав. Харин Ц.Даваасүрэн гишүүн энэ удаад намаасаа гарч зүрхэлсэнгүй. Харин УИХ дахь намын бүлгийн хуралдаа суухгүй байхаар шийдэж.
Дээрх дөрвөн гишүүнтэй нэгэн үе мөр зэрэгцэн эсэргүүчүүдийн эгнээнд багтаж байсан Д.Балдан-Очир, Р.Раш, Д.Загджав, Б.Бат-Эрдэнэ нар одоохондоо намдаа үлдэхээр болж. Үнэн худал нь мэдэгдэхгүй жиг жугаар бол дээрх гишүүдэд намын удирдлага нь тойрог хуваарилахаар болсон учир үйл хэргээсээ буцахаар шийдэж загас шиг л дуугүй байх ам тангараг өгсөн сурагтай.
Экс Ерөнхийлөгч Н.Энхбаярыг баривчлагдсан шөнө УИХ-ын гишүүн Д.Тэрбишдагва, Ч.Улаан, О.Чулуунбат нар түүнтэй хамт байлцсан. Үүгээрээ тэд экс Ерөнхийлөгч Н.Энхбаярын талынх гэдгээ ард түмэнд баталсан. Тэдний намаасаа гарах болсон нь энэ үйл явдалтай холбоотой байж болох юм гэсэн таамгийг зарим нэг хүн дэвшүүлээд буй. Гэхдээ тэднийг илчлэгдэхээс өмнө ч нэр бүхий гишүүд МАН-аас МАХН руу гулсах тухай яригдаж, бичигдэж байсан. Зовох цагт нөхрийн чанар танигдана гэгчээр нэгэн үе хайр ивээлийг нь хүртэж, албан тушаал, эд хөрөнгө гээд юм юмаар дутаагаагүй Н.Энхбаяр даргынхаа ач тусыг дээрх гурван гишүүн мартаагүй гэдгээ баталж буй хэрэг гэлтэй.
Н.Энхбаярыг баривчлах тушаал өгсөн байж болох Ц.Нямдорж сайдыг огцруулахгүй авч үлдсэн МАН-ын гишүүдэд гомдсон сэтгэлээ ийн илэрхийлж байна гэж ойлгож ч болох. Гэхдээ нэгэнт намын нөхөд дундаа Н.Энхбаярын хүмүүс гэж адлагдаж сонгуульд тойроггүй үлдэх нь тодорхой болсон учир нэр цэвэр байгаа дээрээ МАН-аас МАХН руу урвасан нь дээр гэж үзсэн ч байж болох талтай.
Ийнхүү гишүүдээ Н.Энхбаяр буюу МАХН-д алдсан нь МАН-ын нэр төрд нөлөөлөх үү. Энэ асуултыг МАН-ын гишүүд дор бүрнээ тавьж байгаа болов уу. МАХН-ын дарга Н.Энхбаярыг сонгуулиас өмнө шүүхээс гэм буруутайг нь тогтоочихгүй л бол тэрээр нэр дэвшиж мэднэ гэсэн таамгийг улс төр судлаачид гаргаж буй. Түүнтэй УИХ-ын гишүүн Д.Тэрбишдагва, Ч.Улаан, О.Чулуунбат нар хүч сэлбэн сонгуульд оролцохоор парламентад 3-4 суудал чангааж ч мэднэ гэх. Тиймдээ ч сонгуулиар МАН-ынхан АН-аас илүү МАХН-ынхнаас айж буй. МАН-ынхан бусад намаас гишүүн урвуулж авч байсан уу гэхээс УИХ-д суудал эзэлдэг гурван гишүүнээ өөр намд “бэр” болгон буулгаж байгаагүй. Энэ нь тус намын хувьд том цохилт болж мэдэх л юм. Тос дотроосоо өтнө гэгчийг МАН-ын дотор өрнөж байгаа дээрх үйл явдал батлаад буй. Хэзээнээс л энэ намд ийм хэмжээний тэсрэлт болох гээд л байсныг хэн хүнгүй хэлнэ. Намынхаа нэрийг сольсноос л болж ийм зүйл болоод байгаа мэтээр ахмадууд ойлгож МАН-ын ерөнхий нарийн бичгийн дарга У.Хүрэлсүхийг зэмлэж сууна. Асуудлын гол нь нэрээ сольсонд бус МАН-ын идээ бээр нь хагарч байгаа хэрэг гэж тайлбарлах улстөрчид олон бий. МАН-ын өрсөлдөгч АН-ын гишүүд дарга цэрэг хэнээс ч айхгүйгээр намаа ч тэр, даргаа ч тэд дуртай үедээ л шүүмжилж, огцруулна шүү хэмээн сүрдүүлж, загнаж чаддаг. Харин МАН-ынхан ийм санаа байв ч сачий нь хүрэхгүй гэгчээр дэмий л дотроо бухимдан хэдэн жилийг үзэж буй. Нам, дарга хоёроо муулсан намын гишүүний албан тушаалтай, амьдралтай нь тооцоо боддог учраас тэр. Тэснэ тэснэ гэхэд үүнээс илүү яаж тэсэх вэ гэсэндээ ийнхүү МАН-ын гишүүд хэсэг хэсгээрээ намаасаа нүүр бууруулж байж ч болох талтай. Юутай ч, тэд булган сүүлтэй байх эсэхийг цаг хугацаа харуулах биз.