Монгол Улсаас Бүгд Найрамдах Индонез Улсад суух Онц бөгөөд Бүрэн эрхт Элчин сайдаар Шагдарын Батцэцэг, Холбооны Бүгд Найрамдах Бразиль Улсад суух Онц бөгөөд Бүрэн эрхт Элчин сайдаар Чулуунбаатарын Сосормаа нарыг тус тус томилуулах тухай хэлэлцэн дэмжээд саналыг Монгол Улсын Ерөнхийлөгчид өргөн мэдүүлэхээр тогтлоо. Жакарта, Бразилиа хотод Элчин сайдын яам нээн ажиллуулах асуудлыг УИХ-ын 2013 оны тавдугаар сарын 25-ны өдрийн нэгдсэн чуулганаар хэлэлцэн шийдвэрлэж, 43 дугаар тогтоол гаргасан юм. Энэ шийдвэрийн дагуу Жакарта, Бразилиа дахь Элчин сайдын яамыг нээн ажиллуулахаар боллоо.
Бүгд Найрамдах Индонез Улс, Холбооны Бүгд Найрамдах Бразиль Улсад суух бүрэн эрхт төлөөлөгчийн газрын тэргүүнийг томилуулж, эдийн засаг, худалдаа, соёл, боловсрол болон бусад салбарт хамтын ажиллагаа хөгжүүлэх чиглэлээр Дипломат төлөөлөгчийн газрын тэргүүн Элчин сайдын түвшинд идэвх санаачилгатай, өргөн цар хүрээтэй үйл ажиллагаа хэрэгжүүлэх нь зүйтэй гэж үзлээ.
Ч.Сосормаа сэтгэлзүйч, судлаач, төрийн захиргааны менежер мэргэжилтэй, хуучнаар ЗХУ-ын Смоленск хотод багшийн сургууль, УБИС, АНУ-ын Колорадогийн Их сургуулийг тус тус төгсчээ. Монгол Улсын Ерөнхийлөгчийн хүний эрх, иргэний оролцооны бодлого хариуцсан зөвлөхөөр ажиллаж байгаа.
Ш.Батцэцэг “Эй Би Ай” хүрээлэнгийн захирал, МҮОНРТ-ийн үндэсний зөвлөлийн гишүүнээр ажилладаг.