Хүссэн их дээд сургуульдаа суралцаж, мэргэжил эзэмших тийзийг ЭЕШ давж байж авдаг. 11 жил сурсан бүхнээ дайчлах энэ шалгалтаар хамгийн ихдээ 800 оноо авах ёстой. Хэрэв 800 оноо авсан бол ногоон карт хожсон л гэсэн үг. Хүссэн сургууль, хүссэн сургалтын хөтөлбөр нээгдэнэ. Гэхдээ МУИС-ийн зарим хөтөлбөрт цөөн элсэгч авдаг учраас 800 оноотой ч хяналтын тооноос хэтэрсэн элсэгчдийг шалгаруулах дараагийн шалгуур Бүрэн дунд боловсролын гэрчилгээнд тусгасан хичээлийн дундаж дүн. Ингээд бодохоор ЭЕШ-даа сайн оноо аваад зогсохгүй бүх хичээлийн дүнгээ өндөр байхад анхаарах ёстой болж байна.
Энэ жилийн хувьд их, дээд сургуульд элсэгчдийн чанарыг сайжруулах үүднээс БШУ-ы сайд Л.Гантөмөр тушаал гаргаж, сургуулиудын босго оноог 450 байхаар тогтоосон. Өнгөрсөн жилийнхээс 50 оноогоор өндөрссөн гэсэн үг. Хувийн дээд сургуулиуд л 450 оноог босгоо болгодог бол төрийн өмчийн сургуулиуд 560-аас эхэлнэ. Зарим хөтөлбөртөө 650 онооны босго тогтоосон нь ч байна.
Гэхдээ шалгуулагч ЭЕШ-даа 650-иас дээш оноо авбал төрийн сангийн зээлээр суралцах боломж нээгдэнэ. Энэ жилийн хувьд ЭЕШ өгөхөөр 37 мянга гаруй хүүхэд бүртгүүлсэн. Тэд бүгд л их дээд сургуульд элсэх хүсэлтэй байгаа. Гэхдээ төрийн сангийн тэтгэлгийг энэ жил төрийн болон хувийн өмчийн сургуулиудын 6500 оюутанд л олгоно. Тухайлбал, МУБИС-д багшийн мэргэжлээр суралцах сонирхолтой элсэгч ЭЕШ-д 750-иас дээш оноо авсан бол 100 хувийн тэтгэлгээр, 650-750 оноо авсан бол 50 хувийн тэтгэлгээр суралцах боломжтой. Ингэхдээ төгсөөд таван жил мэргэжлээрээ ажиллах гэрээ БШУЯ-тай хийнэ. Тэгэхээр ЭЕШ-даа өндөр оноо авбал хүссэн их дээд сургуульдаа сурахаас гадна төрийн сангийн зээлд хамрагдах боломжтой.
