Америкийн цэргийн албан хаагч байгаад, Филаделфийн цаг хугацааны туршилтад оролцсон Ал Билек өөрийгөө 2137 онд хоёр долоо хоног, 2749 оны үед бүр хоёр жил амьдраад ирсэн гэж баталж байна.
Түүнийхээр бол хүн төрөлхтнийг ойрын жилүүдэд анагаах ухаанаас аваад газар зүйн хувьд асар их өөрчлөлт хүлээж байгаа гэнэ. Ал Билек 2137 онд очоод нэгэн эмнэлэгт цацраг идэвхийн өндөр чадлын эмчилгээ хийлгэсэн гэнэ. Тэр үед хүн төрөлхтөн уламжлалт эмчилгээнүүдийг үр ашиггүй хэмээн татгалзсан байх юм байна. Эмчилгээ хийлгэх хугацааны нь туршид телевизээр мэдээлэл, сургалтын хөтөлбөрүүдээр 100 жилийн дараах дэлхийн хөгжлийн тухай үзэж байсан гэж ярьсныг гадаадын хэвлэлүүдээс иш татан Utro.ru бичжээ.
Билекийн үгээр бол манай дэлхийн их өөрчлөлт 2025 оноос эхлэх юм байна. Энэ нь юун түрүү дэлхийн дулаарал, гадны ертөнцтэй холбоо тогтоосноор эхэлнэ гэнэ. Ингээд 2137 он гэхэд далайн усны түвшин эрс дээшилж тивүүдийн газрын зураг өөрчлөгдөнө. Дэлхийн хүн ам ч дөнгөж 300 сая болсон байх юм байна. Тэр цагт Америк маягийн тогтолцоо байхгүй болж цэргийн түр засгийн газар маягийн дэглэм тогтсон байх гэнэ. Энэ бүхэн бол харь гаригийнхантай холбоо тогтоохын эхлэл болж АНУ, Европ болон Орос Хятадын хооронд дайн болох юм байна.
Билекийн хэлснээр бол Америкийн засгийн газар харь гаригийнхантай 1954 оноос 2000 онд хамтран ажиллаж технологийн болон дэлхийн шинэ дэглэм тогтооход асар их амжилт олсон. Харин дараа нь дайн болж энэ бүх ололтыг үгүй хийнэ гэсэн ч  яг хэзээ гэдгийг тодорхой хэлээгүй байна.
Хуучин дайчин Ал Билек дараа нь 2749 онд очсон байна. Түүний баталж байгаагаар бол тэр цагт дэлхий дээр дэг журам алга болж хүмүүс социалист маягийн нийгэмлэгүүдэд амьдрах болох гэнэ. Түүний очсон газарт хүмүүс хэрэгцээт зүйлсээ хүссэн хэмжээгээрээ авдаг болсон байжээ. Энэ цагт далайд хөвж явдаг асар том хотууд бий болно гэнэ. Гэхдээ Билек 2749 он гэдэг цаг хугацааны асар их орон зай учраас тэр бүрийг сайн санахгүй байгаагаа хэлжээ.
Филадельфийн туршилт гэдэг нь АНУ-ын Тэнгисийн цэргийн флотод 1943 оны аравдугаар сарын 28-нд болсон нэг ослыг хэлдэг байна. Тэгэхэд тэнгисийн 181 хүнтэй DE 173 "Элдриж" хөнгөн хөлөг осолдож багийн ихэнх гишүүн асар их цацраг идэвхит халдлагын золиос болон амь алдсан. Үүнийг тухайн үедээ ямар нэгэн нууц туршилт, төсөл гэсэн ч АНУ-ын тэнгисийн цэргийн флот үүнийг үгүйсгэдэг. Хүмүүс болохоор энэ нь асар хүчтэй цахилгаан соронзон талбай ашиглан далд мэдрэхүй ашиглах гэсэн туршилт байсан гэж итгэдэг ч  өнөө болтол амьд байгаа хөлгийн багийн олон хүн үүнийг зохиомол зүйл гэж баталдаг байна. Харин Ал Билек л анх удаа ийм зүйл ярьж байгаа нь энэ.