Ашигт малтмалын газрын гурван геологич Баянхонгор аймагт 20 хоногийн хугацаатай ажиллаж байхдаа тус аймгийн Баян-Өндөр сумаас 120-130 км зайд “Идрэнгийн нуур” гэдэг газар явж байхад машинынх нь дугуй хагарч цааш явах боломжгүй болсон байдаг.
Тиймээс Геологчид суурин газар бараадахаар Шинэжинст сумыг чиглэж явсан ч замдаа салсан юм. Учир нь тэдний нэг болох 27 настай эрэгтэй М GPS төхөөрөмжөө авч зам хайхаар яваад үлдсэн хоёроосоо холбоо тасран сураггүй болсноор долоо хоноод байсан юм. Эрж хайх ажилд нутгийн иргэд, онцгой байдлынхан хүч тавин ажилласаар өнөөдөр эрлийн ажил дууслаа. Эрлийн ажилд нийт 60 орчим хүн, 50 гаруй техник хэрэгсэл оролцсон байна.
Эхлээд нутгийн иргэд хоёр геологчийг олж, эмнэлэгт хүргэсэн бөгөөд төөрсөн 27 настай геологчийн гутлын мөрийг олсон ч мөр хэсэг яваад тасарсан талаар мэдээлж байсан. Тэгвэл өнөө өглөө 10 цагт Баян-Өндөр сумын дөрөвдүгээр багийн нутаг “Хар довны үзүүр” гэдэг газар нас барсан байсныг нь олж цогцсыг ар гэрийнхэнд нь хүлээлгэн өгсөн байна.