Өнгөрсөн ням гарагт Украины эрх баригчид тусгаар тогтнолынхоо баярыг тэмдэглэн Киевийн төв талбайд цэргийн жагсаал хийлээ. Ёслолын жагсаалд Украинд үйлдвэрлэсэн “БТР-3”, “БТР-4Е” тээвэрлэгч, “Дозор” хуягт машин, “Град” ба “Смерч” гэсэн тийрэлтэт сум харвагч, агаарын довтолгооноос эсэргүүцэх “Оса”, “С-300” пуужинт систем, “Точка-У” ойрын зайн баллистик пуужинг нийтэд дэлгэжээ. Оролцсон цэргийн албан хаагчид ба байлдааны техникийг энэ жагсаалаас шууд Украины зүүн мужууд руу тусгай ажиллагаанд явуулжээ. Харин Украины зүүн мужуудад салан тусгаарлагчид энэ өдөр олзлон авсан украин цэргүүдийг Донецк хотын гудамжаар цуваанд оруулан явуулжээ. Украины армийн тасралтгүй үргэлжилж байгаа их буу, тийрэлтэт сумын буудлага бөмбөгдөлтөд өртөн ойр дотны хүмүүсээ алдаж, орон гэргүй болсон хотын иргэд украин цэргүүд рүү өндөг, ялзарч муудсан ногоо шидэлжээ. Украины эрх баригчид тусгаар тогтнолын өдрийн өмнө буюу наймдугаар сарын 24-өөс өмнө салан тусгаарлагчдын гол түшиц болсон Донецк хотыг эзлэн бүрэн цэвэрлэх даалгавар өгсөн ч цэргийнхэн хэрэгжүүлж чадсангүй. Харин салан тусгаарлагчид өрсөн давшилтад орж Азовын тэнгис рүү гарц гаргахаар тулалдаж эхэлсэн байна. Ням гарагийн орой Украины армийн 7000 гаруй цэргийг салан тусгаарлагчид бүслээд байгаа тухай мэдээлж байв.