Дүүргийн эрүүгийн хэргийн анхан шатны I шүүх нутаг дэвсгэрийн харьяаллын дагуу таван хорих анги хариуцаж ажилладаг бөгөөд Эрүүгийн байцаан шийтгэх хуульд заасан ялаас хугацааны өмнө тэнсэн суллах тухай, ял эдлэх дэглэм дээшлүүлэх, бууруулах асуудлыг шүүх хуралдаанаар хянан шийдвэрлэдэг байна. Харин энэ оны гуравдугаар улирлын байдлаар 449 захирамжаар 449 хорих ял эдэлж буй ялтнуудын талаарх санал дүгнэлтийг хүлээн авч шийдвэрлэжээ. Хуульд зааснаар хорих ял шийтгүүлсэн ялтан засарч хүмүүжснээ зан байдлаараа харуулж, гэмт хэрэг үйлдэж учруулсан хохирлоо нөхөн төлсөн, гэм хорыг арилгасан 405 ялтныг хорих ялаас хугацаанаас нь өмнө тэнсэн суллажээ. Мөн сэтгэцийн эмгэг судлалын шинжээчийн дүгнэлтээр сэтгэцийн өвчтэй болох нь тогтоогдсон, ялтан ял эдлэхэд саад учруулахуйц хүнд өвчнөөр өвчилсөн гурван ялтныг өвчний учир хугацаанаас өмнө ял эдлэхээс чөлөөлсөн байна. Тэгвэл таван ялтанг хугацааны өмнө тэнсэн суллах тухай санал, дүгнэлтийг хэрэгсэхгүй болгож, жилд хоёроос дээш удаа сахилгын шийтгэл хүлээж, дахин ноцтой зөрчил гаргасан есөн ялтны хорих ялын дэглэмийг чангаруулсан байна. Түүнчлэн хорих ялын талаас доошгүй хувийг эдэлсэн, сахилгын зөрчил гаргаж байгаагүй, хөдөлмөрлөх үүргээ амжилттай биелүүлж урамшуулагдсан 30 ялтныг ял эдэлж буй дэглэм бууруулжээ.
