Хүйтний ам наашилж буй энэ улиралд ханиад томуунаас эхлээд бие хямрах, ядрах үе цөөнгүй тохиолддог. Тэгвэл яагаад намар цагт хүмүүс өвдөөд, элдэв ханиад томуунд өртөмхий болдог шалтгааныг мэргэжилтнүүд ингэж тайлбарлажээ.
-Намар бол өрнүүн их ажлын улирал. Зунжин амарсан хүүхдүүд гэлтгүй ээлжийн амралтаа авсан хүмүүс ч ажилдаа орж, гэнэт их ачаалал авдаг. Шөнөдөө унтах цаг ч багасч, өдөржин завгүй гүйх үе зөндөө гарна. Үүнээс үүдэн дархлаа суларч, халдвартай тэмцэж чадахаа больдог. Үүний зэрэгцээ хот суурин газрууд ч хөл хөдөлгөөнд ордог болохоор ханиад томууны халдвар авах эрсдэл огцом нэмэгддэг. Тиймээс энэ үед ажил амралтаа зөв зохицуулж, хувийн ариун цэврээ сайтар сахиж байх хэрэгтэй.
-Улирал солигдох үед агаарт бидний нүдэнд харагдахгүй тоос шороо, бохирдуулагчид гарч ирдэг. Энэ нь вирусийн гаралтай ханиад тусах, хамраас нус гоожих, улирлын чанартай харшлыг сэдрээх шалтгаан болдог.
-Та энэ өдрүүдэд ажил, сургуульдаа явахдаа нар хожуу мандаж, харанхуй болсныг анзаарсан л биз дээ. “Хар үүрээр” ажилдаа явж байгаа мэт энэ мэдрэмж сэтгэл санаагаар зогсохгүй бие эрүүл мэндэд ч нөлөөлдөг байна. Бидний зан байдал тухайн өдрийн тэнгэрийн байдлаас ихээхэн хамаардаг гэдгийг судлаачид аль хэдийнэ тогтоосон. Нартай сайхан өдөр хүмүүсийн зан ааш ч сайхан байдаг. Тэгэхээр нар орой мандаж, эрт жаргадаг улирлын онцлог нь хүмүүсийг өвдөхөд нөлөөлдөг байх нь.
-Хэдий манай улс жилийн дөрвөн улиралтай ч хавар, намрын улиралд хувцсаа тохируулж өмсөх тийм ч амар биш. Өдөртөө дулаахан байх хэрнээ өглөө, оройдоо маш сэрүүхэн байдаг энэ өдрүүдэд хувцсаа тохируулж өмсч чаддаггүйгээс ханиад томуунд өртөх нь амархан.
