МАН-д Ерөнхий сайдад нэр дэвшигч Ч.Сайханбилэгийг томилуулах асуудлаар зөвшилцөх бичгээ даваа гарагт өгсөн. Үүнийг МАН-ын Удирдах зөвлөл болон УИХ дахь бүлэг хуралдаж нэр дэвшигч Ч.Сайханбилэг, намын дарга З.Энхболдын хамт мөрийн хөтөлбөрөө танилцуулсан боловч эцэстээ татгалзсан хариу илгээжээ. АН-ын дарга З.Энхболдод албан ёсны хариугаа өчигдөр өглөө явуулснаа МАН-ын дарга М.Энхболд хэллээ. Юутай ч сөрөг хүчин Монгол Улсын нийгэм, эдийн засгийг хямралт байдалд оруулж, өрийн дарамтанд хүргэсэн алдаатай бодлого хэрэгжүүлээд огцорсон Засгийн газрын Хэрэг эрхлэх газрын даргыг Ерөнхий сайдаар томилохыг зарчмын хувьд дэмжихгүй гэжээ. Эдийн засгийн өнөөгийн нөхцөл байдлыг сайжруулж чадах мэдлэг туршлагатай, намуудын зөвшилцөл ойлголцлыг хангаж чадах, УИХ дахь намын бүлгийнхээ бүрэн дэмжлэгийг авч чадахуйц хүнийг дэвшүүлбэл зөвшилцөхөд бэлэн хэмээн албан бичгээр хариу өгсөн байна.
Ингээд МАН-ын дарга М.Энхболд, УИХ дахь МАН-ын бүлгийн дарга С.Бямбацогт, МАН-ын Ерөнхий нарийн бичгийн дарга Ж.Мөнхбат нар мэдээлэл өгч, асуултад хариуллаа.
-Ерөнхий сайдад нэр дэвшигчийн хувьд МАН дотор санал хуваагдмал байгаа гэсэн. Дараагийн засгийн газарт Ардын нам орж, хамтарч ажиллах уу?
Ж.Мөнхбат: -АН-аас МАН-тай зөвшилцөх саналд хуулийн дагуу улс төрийн намтай гэж байгаа учраас гүйцэтгэх дээд байгууллага нь шийдвэрээ гаргадаг. Тиймээс МАН-ын Удирдах зөвлөл хуралдаад нэр дэвшигчийн, АН-ын байр суурийг сонсохоор бүлгийн хуралдаа урьсан. Үүний дараа УИХ дахь намын бүлгийнхээ гишүүдийн саналыг сонссон юм. Түүнээс биш бүлэг энэ асуудлаар хуралдаж улс төрийн эцсийн шийдвэр гаргах хуулийн заалт байхгүй. Санал хураалт явуулаагүй гэсэн үг. Бүлэг тусдаа Удирдах зөвлөл нь тусдаа шийдвэр гаргасан юм биш. АН-аас зөвхөн Ерөнхий сайдад нэр дэвшигчийг зөвшилцөх асуудлаар хандсан. Хамтрах эсэх асуудал Ардын намд ирээгүй учраас хариулах боломжгүй.
-Удирдах зөвлөлийн шийдвэрийг бүлэг дагахаар болсон гэж ойлгох уу. Удирдах зөвлөлд яг хэдэн хүн байдаг юм бэ?
М.Энхболд: -МАН-ын Удирдах зөвлөл улс төрийн шийдвэр гаргадаг. Улс төрийн намын тухай хуульд намын бүлэг, намын удирдах дээд байгууллага харилцаж ажиллах талаар тодорхой заасан. Энэ дагуу МАН-ын үндсэн дүрмийн хүрээнд Удирдах зөвлөл, бүлэг үйл ажиллагаагаа уялдуулж явдаг. МАН-ын Удирдах зөвлөл 21 гишүүнтэй. Нийт гишүүдийн 63 хувь нь нэр дэвшигчийг зөвшилцөх боломжгүй гэж үзсэн. Бид ямар нэг байдлаар 2012 оноос хойш Засгийн газарт орсонгүй гэж өсөрхөөд огрцуулах асуудлыг тавиагүй. Улс орны эдийн засагт тулгамдаад байгаа асуудлыг Засгийн газар шийдэж чадахгүй нь олон зүйлээр харагдаж байгаа учраас хариуцлага тооцохыг сүүлийн хоёр жилд удаа дараа тавьсан. Эдийн засгийг цааш нь аваад явах чадалтай, боловсролтой хүн Засгийн газраа бүрдүүлж ажиллах хэрэгтэй гэж үзэж байгаа.
-Хэрэв Р.Амаржаргал гишүүнийг зөвшилцөхөөр оруулж ирсэн бол дэмжих байсан уу. Түрүүн хэлсэн шалгуураар тэгж ойлгогдож байна?
М.Энхболд: -Тэрийг оруулж ирсэн бол дэмжих байсан уу, яасан гэдэгт шууд хариу өгмөөргүй байна. Орж ирсэн асуудалд хариу өгсөн нь энэ. АН, ҮЗХ нь бидний тавьж байгаа шаардлагуудыг харгалзаж үзээд дараа дараагийн хүмүүсээ оруулж ирэх юм бол зөвшилцөхөд бэлэн байгаа.
-Та нарын хувьд зөвшилцөж болохоор гишүүн гэвэл хэнийг хэлж болохоор байна вэ?
С.Бямбацогт: -Тэр асуудлаар хандаад байхад нь болзол тавиад тийм хүн оруулж ирвэл дэмжих бололцоотой гэж хариулах боломж алга. Энэ бол УИХ-д олонхи болоогүй ч олон суудал авсан АН, хамтарч ажиллаж байгаа “Шударга ёс” эвсэл, ИЗНН-ын шийдэх асуудал. Үндсэн хуульд улс төрийн намуудтай зөвшилцөж Монгол Улсын Ерөнхийлөгчид өргөн мэдүүлнэ гэсэн байгаа. Энэ хүрээнд олон суудалтай нам зөвшилөж байна. Зөвшилцөл амжилтгүй болбол дараа нь парламентад суудалтай намууд зөвшилцөх хуулийн заалт бий.
-Засгийн газар байгуулах асуудлаар “Шударга ёс” эвсэл, ИЗНН-д санал хүргүүлсэн гэсэн. Танай намд энэ албан хүсэлт ирээгүй юм уу?
Ж.Мөнхбат: -Манай бүлэгт АН-ын дарга Энхболд ирж асуултад хариулсан. Өмнөх Засгийн газарт хамт ажиллаж байсан учраас ИЗНН, “Шударга ёс” эвсэлд хамтран ажиллах санал явуулсан гэсэн. МАН-д ямар нэг байдлаар албан ёсны хүсэлт ирээгүй. Хүсэлт ирээгүй учраас бид хэлэлцээгүй. Хэлэлцээгүй учраас байр сууриа илэрхийлэх боломжгүй.
-Ч.Сайханбилэгийг УИХ-ын чуулганаар хэлэлцэхэд МАН-ын бүлгийн гишүүд нэгдсэн байдлаар санал өгөх юм уу?
С.Бямбацогт: -МАН бол нэгдмэл удирдлагатай, хамтын шийдвэр гаргадаг. Хамтын шийдвэртээ хэзээд нэгдсэн байж ирсэн. Монгол Улсын Ерөнхий сайд томилогдсоноос хойш Засгийн газар байгуулах саналаа оруулж ирэх ёстой. Ерөнхий сайдын асуудлаар зөвшилцөх бичиг явуулсан гэж Энхболд дарга хэлсэн.
-Бүх нам хамтарч Засгийн газраа байгуулаад явъя гэдэг санал МАН-ын бүлгийн гишүүдээс цөөнгүй гараад байгаа?
М.Энхболд: -УИХ-ын гишүүн бол аливаа асуудалд хандаж байгаа өөрийнхөө байр суурийг илэрхийлэх эрхтэй. УИХ-ын гишүүний эрхзүйн байдлын тухай хуульд ч ингэж зааж өгсөн. Шаардлагатай гэж үзвэл тухайн асуудлаар бүлэг хуралдаж, нэгдсэн нэг ойлголтод хүрч, гарсан шийдвэрийг дагаж ажиллах ёстой. Энэ горимыг бид хатуу барьж ажилладаг. Засгийн газрыг хурдан байгуулж, үйл ажиллаагаа явуулах ёстой. Шинэ Засгийн газрын ажиллах нөхцөл бололцоо, ажиллаж буй хүмүүсийн алдааг засч залруулж байж эдийн засагт нааштай нөлөө үзүүлэх нь цаг хугацаанаас илүүтэй ач холбогдолтой.