Олон улсын цагаачлалын өдрийг тохиолдуулан ИБШХЕГ-аас манай улсад амьдардаг цагаач иргэдтэй хэрхэн ажилладаг талаар тус газрын мэргэжилтэн Н.Батбилэгээс тодрууллаа.
Монгол улсад цагаачлах хүсэлтэй гадаадын иргэд цөөнгүй байдаг ч нэлээд нарийн хяналт шалгалт, итгэмжлэлээр тусгай зөвшөөрөл өгдөг аж. Цагаач иргэд монгол иргэнтэй гэр бүл болсон нөхцөлд багагүй хөнгөлөлт эдэлдэг аж. Тухайлбал, жил бүр оршин суух төлбөрөөс чөлөөлөгдөхөөс гадна ажил хийх боломж олгодог. Манай улс 2011 онд хоёр, 2012 онд гурав, 2013 онд хоёр, энэ онд найман иргэнд тус тус цагаачлах эрх олгожээ. " Гадаадын иргэдийн эрх зүйн байдлын тухай хууль"-ийн дагуу энэ ажлыг хийж байгаа бөгөөд энэ жилийн хувьд БНХАУ, Филиппин, Канад зэрэг улсын ЭСЯ дээр уулзалт хийж иргэдийнх нь асуудлыг ярилцсан байна. Одоогоор хууль бусаар цагаачилж буй нэг ч иргэн байхгүй гэдгийг ИБШХЕГ-ынхан мэдэгдэв. Бид маш нарийн хяналт тавьдаг учраас хууль бус цагаачлал байхгүй гэдгийг тэд батлав. Өнөөдөр ОХУ-ын ЭСЯ-тай хамтран Оросын шинжлэх ухаан соёлын төвд оросын цагаач болон манайд түр, байнга оршин суудаг иргэдтэй уулзалт хийж байна. Хоёр улс харилцан визгүй зорчиж эхэлснээс хойш иргэдийн хөдөлгөөн өмнөхөөс дөрөв дахин нэмэгджээ. Тиймээс энэхүү уулзалтыг хийж байгаа аж. Гадаадын цагаач иргэн жилд 395,000 төгрөгийн төлбөр төлж, орогнох эрх авдаг юм байна.
