Германы умард нутгийн Фленсбург хотод нэгэн эмэгтэй гадны ямар ч нөлөөгүйгээр өөрөө шатсан сонин тохиолдол гарсан байна.  Хотын цэцэрлэгт эмэгтэй лангууны ард зүгээр л сууж байснаа гэнэт шатаж эхэлжээ. Нүдээр үзсэн хүмүүс энэ тухайд эмэгтэй рүү хэн ч ойртоогүй, өөрөө ч ямар нэг үйлдэл хийгээгүй гэж ярьснаас үүдээд Flensburger Tagesblatt хэвлэл үүнийг өөрөө шатах үзэгдэл гэжээ.
Ойролцоо байсан хүмүүс түүнийг унтраахаар оролдож зарим нь эмч дуудсан байна. 40 настай, Маврикий улсаас ирсэн тэр эмэгтэй нэлээд хүнд байдалтайгаар эмнэлэгт очсон байна.
Цагдаагийнхан ч энэ хэрэгт гадны нөлөөлөл байхгүй, амиа хорлох гэсэн хэрэг байж магадгүй гэсэн бол  нүдээр үзсэн гэрчүүдийн яриа нь энэ явдал өөрөө шатах үзэгдэл байж болох гэсэн таамаг төрүүлснийг хэвлэлүүд бичиж байна. Өөрөө шатах буюу SHC (Spontaneous human combustion) үзэгдэл гэдэг нь амьд хүн юм уу үхсэн хүний цогцос ямар ч нөлөөлөлгүйгээр өөрөө шатах ер бусын үзэгдлийг хэлдэг юм байна.
Ийм анхны тохиолдол бүр XYI  зууны эхээр тохоилдож байсныг түүхэнд тэмдэглэж үлдээжээ. Тэр цагт энэ үзэгдлийг бурхны шийтгэл, ад чөтгөрийн хорлол, гэсгээл, илбэ зэргээр нэрлэж тайлбарлаж байсан гэдэг.
Хожим нь ХIX зууны үед энэ үзэгдлийг архи, согтууруулах ундаа хэрэглэсэнтэй холбон тайлбарлахыг оролдож байж. Ийм тохиолдлуудын тухай баримт бичгүүдэд хүний бие бүхэлдээ шатаж зарим үд зөвхөн гуталтай хөл нь үлдсэн гэж тэмдэглэсэн байдаг гэнэ. Гэхдээ тухайн хүн шатахад гаднаас ямар ч зүйл нөлөөлөөгүй гэдгийг онцлон тэмдэглэсэн байдаг байна.
2010 онд яг ийм үзэгдэл Ирландад болж 76 настай Майкл Фаэртиг гэрийнхээ шалан дээр түлэгдсэн хэвтэж байхыг олжээ. Түүний байсан өрөөнд гал гаргах ямарч зүйл байхгүй байснаас шүүх эмнэлгийн шинжилгээгээр энэ бол SHC  гэж тогтоосон байна.
Энэ сонин үзэгдлийг эрдэмтэд эцсийн байдлаар тайлбарлаж чадаагүй ч  бүхий л тохиолдолд золиос болж байгаа хүн нь архичин юм уу, чихрийн шижинтэй хүн байгаагаас үзэхэд хүний биед хуримтлагдсан ацетоны хэмжээ хэт ихэссэнээс болдог байж мэднэ гэсэн таамаглал байдаг гэнэ.