Баянхонгор аймгийн Ардчилсан намын дарга, аймгийн Ардчилсан намын сонгуулийн штабын дарга Д.Жаргалсайхан энэ баримтыг нийтэд дэлгэж байгаа юм. Түүний хэлснээр намын байрны үүдний харуулд харанхуй шөнөөр үл таних хүн энэхүү “Маш нууц” гэсэн төлөвлөгөөг авчирч өгсөн аж.

-Үүнээс гадна “Маш нууц” гэсэн нэг ноцтой нууц баримт үзүүллээ. Ямар учиртай төлөвлөгөө вэ?
-Манай намын байрны үүдний харуулд харанхуй шөнөөр үл таних хүн энэхүү “Маш нууц” гэсэн төлөвлөгөөг авчирч өгсөн байсан. Энэ “Маш нууц” гэгч зүйл хэрэв бодитой зүйл бол маш аюултай урхаг дагуулсан төлөвлөгөө байна билээ. Магадгүй хэн нэгний явуулгаар нөгөө намын нэр дэвшигчийнхээ нэр хүндийг унагах гэсэн зүйл байхыг үгүйсгэхгүй. Хэрвээ энэ төлөвлөгөө үнэн байвал сонгуулийн өмнөхөн айлын хашаа хаалга давуулж нэр дэвшигчдийн маань нэр хүндэд халдсан гүтгэлгийн чанартай материал тараах маягийн агуулгатай зүйл дурдагдсан байгаа. Ямартаа ч, бид Ардчилсан намын удирдлагадаа тэр бичгийг илгээж, хуульчдын багаасаа зөвлөгөө авсны үндсэн дээр олон  нийтэд уг төлөвлөгөөг дэлгэх нь зүйд нийцнэ гэж үзсэн юм. Уг бичгийн утга агуулга хар дээр цагаанаар маш тодорхой байгаа учраас мэргэн олон сонгогчдодоо харуулсан нь хэрэгтэй юм болов уу.
Хэрвээ энэ “Маш нууц” бичиг агуулгадаа дурдсан шиг бодитой нь үнэн бол ямархан их аюултайг сонгууль хаяанд ирээд байгаа энэ үед сэрэмжлүүлэхэд илүүдэхгүй. Энэ бичигт сонгуулийн тойрог, хэсгийн хороодыг худалдаж авах, хэсгийн хорооны ажиглагч нарыг санхүүжүүлж өөрийн талд урвуулах, тэр битгий хэл өөрийн намын хороондоо, нэг намаас хамтран нэр дэвшиж байгаа хүндээ хүртэл мэдэгдэхгүйгээр булхай луйвар хийнэ гэж дурдсан байгаа шүү дээ. Аюултай төлөвлөгөө байгаа биз.