Реппер Rokit Bay “Хариуцлага” нэртэй шинэ цомгоо өлгийдөн авчээ. Эцэг, эхчүүдэд хаягласан түүний уг цомогт “Хэний хүүхэд вэ”, “Тасархай залуу”, “Диваажингийн нулимс”, “Ганцаардсан улстөрч”, “Эвшээсэн дагина”, “Аюултай бүс”, “Бороо”, “Бор арьст Гаамп”, “3.2.1” гэсэн есөн дуу багтжээ.
Тэрээр уг цомогт орсон дуунууддаа ёс бус хэллэгүүд орсон учраас бага насны хүүхэд сонсоход зохимжгүй хэмээн үзэж байгаа аж. Энэ талаар “Дууны цомог дээр нас заагаагүй байдаг. Миний бодож байгаагаар 16-гаас дээш насныхан сонсоход болно гэж бодож байна. Дор хаяж 14 нас. Гэхдээ би их сүртэй яриад байгаа болохоор хүмүүс дотор нь учир зүггүй хараал байгаа гэж бодоод байх шиг байна. Тийм биш шүү” хэмээн ярьсан.
Мөн цомгийн ковер зураг болох амандаа цэцэг зуусан залуугийн талаар тайлбарлахдаа “Амаа цэцгээр халхалсан нь би заавал цэцэг шиг, солонго шиг гоё зүйлсийг хэлэх ёстой юм шиг, өөрийнхөө хэлэх гэсэн зүйлээ хэлж чадахгүй байгаа байдлыг илтгэх юм. Бас шорон харж байгаа байх. Түүнд хүүхдүүд намайг хорьсон байна. Энэ нь миний бүтээлч сэтгэлгээг боосон учраас цэцгээр амаа боосон маягтай ийм зураг оруулсан байгаа” хэмээн ярьжээ.
