-Танд АН-ын даргын сунгаанд оролцох тодорхой шалтгаанууд байгаа байх. Хамгийн гол нь юу вэ?
-Би намын VI Их хурал хуралдах хүртэл намын даргын сунгаанд оролцох талаар огт бодоогүй. Гэтэл намын даргыг сунгаагаар сонгохоор шийдсэн. Энэ нь шив шинэ үзэгдэл, цоо шинэ соёл болсон. Мөн хөдөө орон нутгаас намын даргад нэрээ дэвшүүлэх үү гэсэн хүсэлт олноор ирсэн. Тиймээс хамтраад эв зүйгээ олоод, нэг зорилгын төлөө явж чадна гэсэн олон гишүүний хүсэлтийг би анхаарч үзсэн. Хоёрдугаарт би, эв нэгдлийн төлөө хүчин чармайлт гаргаж чадна гэж бодож байгаа. Гуравдугаарт, хуйвалдааны төрийг таслан зогсооё. Хэн нь ч ялсан ялгаагүй хэдхэн хүн хөлжиж, хэдэн толгойг хувааж авч байна. Үүнийг би бие махбод, сэтгэл санаагаараа мэдэрсэн, муу муухайг нь амссан хүний хувьд таслан зогсоох шаардлага нь Алтанхуяг чам дээр ирсэн юм байна гэдгийг маш хатуу ойлгосон. Тиймээс үүний төлөө тэмцэхээр намын даргын сунгаанд оролцож байна.

-Хэрвээ сонгогдвол ажлаа ямар зүйлээс эхлэх хэрэгтэй гэж үзэж байна?
-Хамгийн түрүүнд хаврын сонгуулиар ямар булхай болсон бэ гэдгийг гаргаж тавих ёстой. Эсвээс Ерөнхийлөгчийн сонгууль гэж хөөрцөглөөд дахиад хулхидуулна. Хашир хүн гэж хаширсан хүнийг л хэлнэ. Би их хаширч байгаа. Хажуу бөөрнөөсөө зөндөө “хийлгэсэн” хүн дээ.

-Булхай гэж юуг хэлж байгаа юм бэ. Ялагдсан тодорхой шалтгаанууд бий биз дээ. Эв нэгдэлгүй байсан гэх зэрэг...?
-Манай нам ялагдаагүй, биднийг ялагдуулсан юм. 2020 онд хэрхэн ялах тухай биш 2016 онд бид ялалт авчихсан хийх ажлаа төлөвлөх ёстой байсан юм. МАН бидний гурван зүйлээр тоглосон. Эхлээд хүний, өөрийн нийлж байгаад Шинэчлэлийн Засгийн газрыг огцруулсан. Дараа нь, хоорондоо хэрэлддэг болгож харагдуулсан. З.Энхболд, Ч.Сайханбилэг хоёр хэрэлдээд л эхэлсэн. Сүүлд нь, МАНАН-гийн Засаг бүрдүүлж байгаад МАН өөрт ашигтай бүх шийдвэрийг гаргасан.

-Ямар шийдвэрүүд гаргасан гэж?
-Сонгууль болох гэж байхад бүртгэлийн байгууллагаа статистикийн газартай нийлүүлсэн. Энэ нь сонгуульд булхай оруулахад чиглэж байсан. Дараа нь гааль, татварыг нийлүүлж, дэд сайдгүй болгосон. Дэд сайд нараа л алга болгочихвол гайхалтай их мөнгөтэй болно, хэмнэнэ гээд байсан. Тэгээд мөнгөтэй болоогүй биз дээ. МАН-ынхан хов хоосон юм авсан зардлаа танана гэсэн ч одоо дэд сайдтай ажиллаж байдаг. Бүртгэл, статистик, гааль, татвараа буцаагаад салгасан.
Би хамгийн сүүлд нь Сонгуулийн хуулиар битгий оролдооч гэсэн ч өөрчилж, хүний мэхэнд орсон. Хуучин хуулиараа УИХ-ын сонгуульд орсон бол луйвардууллаа гэхэд л 30 гаруй суудалтай байх ёстой байв. Гэтэл 40 орчим хувийн санал авсан манай нам есхөн суудалтай, 40 гаруйхан хувийн санал авсан МАН 65 суудалтай байна. Энэ бол Сонгуулийн хуулийг өөрчилж, МАН-д “бэлэн хоол” бэлдэж өгсний гай. Би энэ талаар хоолойгоо сөөтөл ярьсан даа.