Их, дээд сургуулиудын элсэгчдийн бүртгэлийг зогсоолоо
2017 оны 5 сарын 10
Их, дээд сургуулиуд энэ сараас эхлэн элсэгчдээ бүртгэж эхлээд байгаа. Тодруулбал, МУИС энэ сарын 1-нээс эхлэн онлайнаар буюу http://burtgel.num.edu.mn хаягаар элсэгчдээ бүртгэж эхэлсэн. Энэ талаараа тус сургуулийн Сургалтын нэгдсэн албаны мэргэжилтэн Д.Мөнхбат  “Элсэлтийн ерөнхий шалгалтын дүн долдугаар сарын 1-нээс хойш гардаг. Элсэгчдийн хувьд долдугаар сард шалгалтынхаа дүнг аваад, сургуульдаа бүртгүүлэх гэхээр ачаалал их үүсдэг. Тиймээс сонголтоо хийсэн хүүхдүүдэд наана нь бүртгүүлэх боломжийг нь олгож байна” хэмээн тайлбарласан. Харин үүнийг нь дагаад хувийн дээд сургуулиуд бүртгэлээ эхлүүлээд байгаа. Тэгвэл энэхүү үйлдлийг нь БСШУСЯ-наас буруушаажээ.

Түүгээр ч зогсохгүй их, дээд сургууль, коллежийн захирал нарт хандан “Оюутан элсүүлэх тухай” албан бичиг хүргүүлсэн байна. Энэхүү бичигт “Боловсролын тухай хууль, тогтоомжид заасны дагуу бүрэн дунд боловсролтой, элсэлтийн ерөнхий шалгалт, түүнээс гадна нарийвчилсан нэмэлт авьяас чадварын шалгалтыг өгсөн, боловсролын асуудал эрхэлсэн төрийн захиргааны төв байгууллагын тогтоосон босго онооны шаардлага хангасан иргэнд их, дээд сургууль, коллежид элсэн суралцах эрх нээгдэнэ.

Иймд энэ хичээлийн жилд ерөнхий боловсролын сургуулийг төгсөн их, дээд сургууль, коллежид элсэн суралцах иргэний бүртгэлийг ерөнхий шалгалтын дүн гарсны дараа зохион байгуулахыг хүсье” гэжээ. Тэгэхээр бүртгэлээ эхлүүлсэн сургуулиуд ЭЕШ дуусах хүртэл элсэгчдээ бүртгэхгүй нь.
Эх сурвалж: www.assa.mn
LIKE бэлэглээрэй. Танд баярлалаа.
Санал болгох
Фото үзэх
Видео үзэх
Зохиогчийн эрх хуулиар хамгаалагдсан. Мэдээлэл хуулбарлах хориотой.