Удаан хугацаанд чимээгүй явсан хошин урлагийн "Захиалгат инээд" хамтлаг шинэхэн уран бүтээлээ үзэгчдэдээ барихад бэлэн болоод байна. Их өв хөрөнгийн эзэн өвгөн насны эцэст гурван хүүгийнхээ эрэлд гардагаар эхлэх "Ах дүү гурав" уран сайхны инээдмийн кино энэ сарын 12-нд Тэнгис кино театрт нээлтээ хийх юм байна. Баян аавтай гурван хүү нь бие биенээ огтоос мэдэхгүй бөгөөд хэрхэн танилцаж бие биенээ олдог тухай тус кинонд харуулах бөгөөд зураг авалт Улаанбаатар хотоос Дорнод аймгийн Халхгол сумын нутаг дахь Буйр нуурын байгалийн сайханд авчээ. Киноны гол дүрд СТА, жүжигчин Х.Манлайбаатар, Р.Адьяа, Ө.Мөнх-Эрдэнэ тогложээ.