Нэгэн долоо хоногийн турш үргэлжилж Монгол төрийн ажлыг гацаасан МАН-ын бага хурал дотоод асуудлаа ярьж албан тушаалаа хуваан, өөрсдийнх нь хэлж байгагаар “өөрчлөлт шинэчлэл” хийж дууслаа. МАН-ын даргаар сонгогдсон Ө.Энхтүвшин намаа бүрэн шинэчлэгдсэн, хамгийн сайн гишүүд нь дарга даамал болсон тухайгаа хэвлэлүүдээр зарлав.
Харин МАН УИХ-д бүлэг байгуулах тухай саналаа хугацаанд нь өгөөгүй. Одоо бүлэггүй хоцрох уу гэсэн сэтгүүлчийн  асуултад “Бүлэггүй болохгүй. Хуулийн жижигхэн ганц заалтаас болж ард түмний сонгосон шийдвэрийг тэгэж ойлгож болохгүй. Ард түмэн хаан шийдвэрээ гаргачихаад байхад зүгээр нэг 24 цагийн дотор гэсэн махан өгүүлбэрээр тэрийг хүчингүй болгодог бүдүүн зүрхтэй хүн Монголд арай байхгүй байлгүй дээ” гэсэн хариу өгчээ. / Үндэсний шуудан.2012.7.30.¹177 /

МАН-ын шинээр сонгогдсон дарга, УИХ-д хоёр  ч удаа сонгогдон ажиллаж байсан улстөрч Монгол Улсын хуулийн заалтыг “зүгээр нэг махан өгүүлбэр” гэж ойлгодог байх нь. Тэгээд ч нэг намын эрх ашгийн үүднээс “зүгээр нэг махан өгүүлбэр”-ийг зөрчиж болно гэж үзэж байна. Тэр бас “хуулийн нэг жижигхэн заалт” гэж онцолжээ. 90 гаруй жил төр барьсан улс төрийн томоохон хүчин МАН-ын хувьд Монгол Улсын хуулийн заалт нь том жижиг гэж бас ялгаатай байх нь.
МАН-ын дарга Ө.Энхтүвшингийн “жижигхэн заалт….зүгээр нэг махан өгүүлбэр” гээд байгаа нь УИХ-ын 1997 оны 2 дугаар сарын 6-ны өдөр баталсан Монгол Улсын Их хурлын тухай хуулийн 17 дугаар зүйлийн 6 буюу “Нам, эвслийн бүлгийн ахлагч Улсын Их Хурлын анхдугаар чуулган дээр Улсын Их Хурлын даргыг сонгогдсоноос хойш 24 цагийн дотор нам, эвслийн бүлэг байгуулсан тухай шийдвэр, нэрсийн жагсаалтыг Улсын Их Хурлын даргад өргөн мэдүүлнэ” гэсэн заалт л даа уг нь.
МАН-ынхан өнгөрсөн он жилүүдэд Монгол Улсын хуулийг том жижиг, махан өгүүлбэр хэмээн зөрчсөөр ирсэн юм биш байгаа.