МАН-ын гишүүд хуралдаж УИХ-ын даргыг сонгох процессийг дахин явуулах, Өвөрхангай аймгийн сонгуулийн маргаантай асуудлыг тохиролцъё, сонгуулийн саналыг гараар тоолъё гэсэн гурван шаардлага тавьж, АН-тай зөвшилцөх санал тавиад байгаа билээ. АН-ынхан тэдний энэ шаардлагыг хүлээж авахгүй гэдгээ мэдэгдсэн.
УИХ дахь МАН-ын албан бус бүлгийн хуралдаанаар дээрх асуудлыг авч хэлэлцээд зөвшилцлийг үргэлжлүүлэн хийх нь зүйтэй гэсэн шийдвэрт хүрсэн байна.
УИХ дахь МАН-ын бүлгийн дарга Н.Энхболд хэлэхдээ, “Парламентат ёсонд цөөнхийнхөө байр суурийг хүндэтгэх, цөөнхийн цаана байгаа сонгогчдын хүсэл сонирхлыг илэрхийлж байх нь хамгийн том зарчим. Цөөнх ямар ч хамаагүй гэдэг байдлаар УИХ-ын ажилд хандаж болохгүй гэж бид үзэж байна. Тиймээс бид зөвшилцье, ажлаа эхнээс нь ярья гэж байгаа юм. Монголын парламент эхнээсээ цөөнхийгөө нухчин дарах аргаар бус хуулийн хүрээнд эв зүйгээ ололцъё гэсэн байр суурьтай байна. Өвөрхангайн асуудлыг харьяаллын бус газар шүүсэн, богино хугацааны дотор шийдсэн нь шүүгчдийн үйл ажиллагаа буруу явагдсан гэж үзэж байна. Бид шүүхийн шийдвэрт нөлөөлөх эрхгүй. Гагцхүү шүүх хурлаа буруу явуулсан гэсэн байр суурьтай байна” гэсэн юм.