МАН ялагдсаныхаа дараа хууччуулаа халж, шинэ дүр төрхөө тодорхойлов. Тэр нь “хуучин” хүмүүс буюу Ө.Энхтүвшин, Г.Занданшатар нар. Гэвч тэд жирийн гишүүдээсээ ялгарч харагдахаас нэгэнт өнгөрсөн хүмүүс юм. Анхнаасаа л гүйцэтгэгч, хэн нэгний гар хөл мэтээр харагдсан болохоор цаашид лидер болж “цоорох” нь юу л бол. Үнэндээ МАН-д зангарагтай удирдагч хэрэгтэй байна. Н.Энхбаяр, С.Баяр нар шиг нөлөөтэй, хүчтэй хүн үгүйлэгдэж байна МАН-д. Гэхдээ цаг үеэ дагаад тэдэн шиг хэрнээ шинэ удирдагчийг төрүүлэхгүй бол МАН дахин өндийж чадахгүйд хүрэх вий.

Өмнө нь МАН-ыг томчуудын нам, харин АН-ыг удирдагчгүй хэмээн тавладаг байлаа. Харин одоо эсрэгээрээ эргээд МАН ямар ч лидергүй харагдаж эхлэв. У.Хүрэлсүхийг шинэ цагийн овжин удирдагч болох болов уу гэж бодтол харин ч эсрэгээрээ болчихож. Хар толгойгоороо хариуцна хэмээн бардамнаад, МАХН нэрээ МАН хэмээн өөрчилсөн нь тэднийг ялагдалд хүргэлээ. Энэ нь У.Хүрэлсүхийг лидер биш ээ гэдгийг батлаад өгөв. Гэвч нэр цэвэр үлдэх нь үү гээд хартал бас л чадсангүй. Хариуцлагаа хүлээсэн шиг хүлээчихнэ гээд хартал бас л чадсангүй. Намын нэрээр парламентад суучихаад жишим ч үгүй “Би хариуцлагаа хүлээчихлээ” гэж хэлсэн нь олны нэр хүндийг нь нэлээд унагажээ.

С.Батболдыг Ерөнхий сайд болох үед л намын залуу­чууд нь гайхаж хүлээж авсан. Даан ч, сүргүй, сул дуутай удирдагчтай болчихлоо гэж. АН сүйгээ цуцалж, Засгаас гарах үед МАН-ын удирдлагууд ярайтал суучи­хаад Ерөнхийлөгчид зад загнуулсан нь бас л намын нөхдөд нь таалагдаагүй. Тэр үед л С.Батболдод удирдагчийн зориг дутлаа хэмээн үзэж, түүнийг хүлээн зөвшөөрөхөөс хаашдаа өнгөрөв. Гэвч сонгуулийн ялагдал бол түүнд тавих эцсийн дүн байлаа. Үүнээс гадна МАН-ын залуучууд удирдлагуудаасаа ус агаар нэхэж байна. Гэвч тэднийг дээш нь гаргахгүй дарсаар үлдээчихэв. Харин оронд нь өөрсдийн гарын хүнээ үлдээлээ. Тэр нь Ө.Энхтүвшин, Г.Занданшатар нар. 

Ж.Сүхбаатар, Б.Цогтбаатар, С.Бямбацогт гээд бас л шинээр төрж, урган гарахыг хүссэн удирдагчийн нэг байлаа. Тэднийг харин халууд хав дарав. Үнэндээ заримыг нь зочид буудалд дуудаж дарамталсан, ганц нэг ухамсрын шанаа өгсөн тухай яриа ч бас гараад амжсан байлаа. Залуучууд нь нэр дэвшихийг хүссэнийхээ төлөө хөшигний цаана шанаа авна гэдэг намын уур амьсгал ямар вэ гэдгийг батлаад өгөв. Ингэж залуучуудаа сүрдүүлсээр байгаад МАН улам л ялзарч буйгаа өөрсдөө ч анзаараагүй бололтой. Ухамсрын ганц шанаа аваад ч маргааш нь нэрээ татаж, өрсөлдөгчөө дэмжээд суух тийм л дарангуйллын систем хэзээ ч халагдахгүй нь. МАН уг нь залуучуудаа жаахан дэмжээд өгвөл шинэ удирдагч төрөхгүй гэсэн үг биш. Зүгээр удирдлагууд нь л халаагаа өгөхийг хүсэхгүй, намаа ялзруулчихаад байгаа юм.

МАН энэ чигтээ мөлийчихвөл орон нутаг, Ерөнхийлөгчийн сонгууль байтугай дараагийн УИХ-ын сонгуулиар ч гарч ирэхгүй л болов уу. Уучлаарай, магадгүй улс төрийн тавцан дахь Нойрссон хүмүүс болоод хувирчих вий дээ. Дараагийн сонгууль магадгүй өнөөдөр жижиг хэмээгдэж буй намуудынх болчихыг хэн ч үгүйсгэхгүй. Тиймээс одоо л МАН алдаагаа засч, гэмээ ухаарах хэрэгтэй. Оройтсон борооны араас цув нөмрөхгүй гэдэг үгийг санаж, цаг алдалгүй намаа шинэчилж, залуустаа зам тавьж өг. Цаг хугацаа гэдэг хамгийн өршөөлгүй гэдгийг мартаж болохгүй.

Хуучнаас хуучны хэмээгддэг Д.Дэмбэрэл, Д.Лүндээжанцан нарыгаа ч бас амраах цаг болсон мэт. Залуустаа хаалгаа тайлж өгөхгүй гэсэн хэрнээ буурлуудаас хагацах дургүй байгаа нь бас л МАН-ыг өдрөөс өдөрт хуучруулж байна. Тиймээс одоо залуучууд дотроосоо лидерүүдээ төрүүлэх цаг иржээ МАН-ынхан.  Танай намыг лидергүй болчихсоныг батлах гэсэн мэт Ерөнхийлөгчийн сонгуульд хэн нэр дэвших бол гэсэн таамаг хүртэл төвлөрч өгөхгүй нь. С.Батболд уу. Үгүй ээ. УИХ-ын сонгуульд ялагдуулчихсан болохоор түүнд шаанс байхгүй. Тэгвэл С.Баяр уу. Түүнийг эрүүл мэндийн шалтгаанаар улс төрөөс бүрмөсөн явж байна гэсэн сураг дуулдсан учраас бас л эргэлзээтэй. Энэ мэтээр дандаа л бүтэлгүй таамаг хөвөрнө. Тиймээс Ерөнхийлөгчийн сонгуульд лидергүй оролцож УИХ-ынхтай адилхан ялагдахгүйн тулд, гишүүд дэмжигчдийнхээ өмнө хүндэтгэл хүлээсэн нэр цэвэр хүн байлгахын тулд МАН одооноос шинэчлэгдэх цаг болжээ.