Улсын Дээд шүүх “Петро Чайна Дачин Тамсаг” компанид холбогдох хэргийг хянан хэлэлцээд анхан болон давж заалдах шатны шүүхийн шийдвэр, магадлалыг хэвээр үлдээлээ. Тус компанийг Дорнод аймгийн Матад сумын нутгаас газрын тос олборлохдоо байгаль орчныг ихээр сүйтгэж, нутгийн иргэдэд ихээхэн хохирол учруулсан хэмээн “Монголын байгаль хамгаалах иргэний хөдөлгөөнүүдийн эвсэл” ТББ-ынхан шүүхэд нэхэмжлэл гаргасан юм. Тэдний эл нэхэмжлэлийг Баянзүрх дүүргийн шүүх одоогоос зургаан сарын өмнө хэлэлцээд “Петро Чайна Дачин Тамсаг” компанийг Матад сумын нутагт үйл ажиллагаа явуулахдаа байгаль хамгаалах, нөхөн сэргээх ажил хийгээгүйгээс байгаль орчинд учруулсан хохирлын нөхөн төлбөрт нэг тэрбум 356 сая 622 мянга 460 төгрөг гаргуулахаар шийдвэрлэсэн. Хариуцагч компани шүүхийн энэ шийдвэрийг эсэргүүцэж, давж заалдах шатны шүүхэд хандсан боловч анхан шатны шүүхийн шийдвэрийг хэвээр үлдээсэн байгаа. Хяналтын шат буюу Улсын Дээд шүүхэд хандсан боловч мөн л өмнөх хоёр шатны шүүхийн шийдвэр, магадлалыг хэвээр үлдээлээ.