УИХ-ын гишүүн Г.Уянгаас МАН-ын гишүүдийн хийж буй үйлдлийн талаар байр суурийг нь сонслоо.
-МАН-ынхан чуулганы хуралдааныг хуралдуулахгүй бойкотолж байна. Та үүнийг юу гэж харж байна вэ?
-Шүүхийн байгууллага дампуурсан үй олон жишээ байсан. 20 жилийн дараа энэ хүмүүс өнөөдөр мэдсэн байж болохгүй. Дампуу шүүх энэ хүмүүсийн л бүтээл. Тиймээс гэв гэнэт тэнгэрээс унаад ирсэн юм шиг ингэж аашлах хэрэггүй Ардын намынхан. Үйл явцыг бүхэлд нь дүгнэвэл Монгол оронд том өөрчлөлт, шинэчлэлт хэрэгтэй. Иргэний хөдөлгөөний хэлж байсан шинэчлэл гарцаагүй хэрэгтэй байна гэдгийг эндээс харуулж байна.
-Шүүхийн шийдвэрт олонх нөлөөлсөн, дарамт орсон байх гэж Ардын намынхан хэлж байна?
-Та нар боддоо. Монголын шүүх хаана ч байсан нэг л хуулийг хэрэглэдэг. Хан-Уулын шүүх нэг шийдвэр гаргадаг, Өвөрхангай аймгийн шүүх бас өөр шийдвэр гаргадаг байж болохгүй шүү дээ. Хэрэв Хан-Уулын шүүх буруу байсан юм бол Өвөрхангайн шүүх зөв шийдвэр гаргах бололцоо байхгүй. Тэгэхээр энэ процесс бол монголын шүүх байгууллага яаж дампуурсаныг л харуулж байгаа юм.
-Шүүхийн шийдвэр эцэслэн шийдээгүй байхад СЕХ шийдвэр гаргасан гэж байна. Энэ тал дээр таны байр суурь ямар байна вэ?
-Энэ бол дампуу шүүх, дампуу төрийг бүгдээрээ таньж байгаа л хэрэг. Түүнээс тэр нь зөв, энэ нь буруу гэж хэлэх үндэслэл байхгүй. Монголын төр, монголын шүүх ямар байгаа нь сүүлийн 20 жил дангаараа төр барьсан энэ хүмүүсийн л үйлдвэрлэсэн зүйл шүү дээ.