УДБЭТ-ын 50 жилийн ой энэ онд тохиож байгаа. Ойн хүрээнд олон ажил хийж буйн нэг нь ABT /American Ballet Theatre/-ын гоцлол бүжигчин Саша Радецкийг урьж, Монголын үзэгчидтэй уулзуулахаар болсон байна. Тэрээр ирэх сард манай оронд хүрэлцэн ирж, УДБЭТ-ын уран бүтээлчидтэй хамтран А.Аданы “Жизель” балетад гоцлохоор болжээ. АВТ нь АНУ-ын балетын хамгийн алдартай компани юм. АВТ энэ улирлын тоглолтоо энэ сарын 16-нд Метрополитан театрт “Родео” балетаар нээжээ. Уг жүжигт Саша Радецки гоцолжээ.
Саша Радецки “Center Stage” киноны гол дүр Чарлигаар анх Холливудад хөл тавьж үзэгчдэд танил болж байжээ.
Тэрээр АНУ-ын Калифорни мужийн Санта Круз хотод төрсөн. 15-тайдаа Москвагийн “Большой театр”-т уригдан, Пётр Пестов хэмээх алдартай багшийн удирдлага дор суралцсан аж. АВТ-ын Классик бүжгийн сургуулийг Михайл Баришниковын удирдлагад суралцан төгсчээ.