Эхээс мэндлээд ердөө 10-хан сар болж байгаа энэ бяцхан ихрүүд 25 метрийн урттай усан санд сэлж чаддаг. Хөлд ч орж амжаагүй атлаа усанд чөлөөтэй сэлдэг тэдний энэ онцгой чадвар эцэг эх, ах дүүсээ гайхашруулаад байгаа гэнэ. Уильям, Элленита хэмээх эгч дүү хоёр ихэр сарын өмнө буюу есөн сартайдаа сэлж сурчээ. Тэдний ээж Шарлотте усанд сэлэлтийн багш бөгөөд саяхан Кипрт гэр бүлээрээ амарч явахдаа хүүхдүүдээ усан санд авч ортол тэд зөнгөөрөө өөрсдөө сэлж чадаж байсан гэнэ. Тэд эхлээд таван метрийн урттай хүүхдий усан бассейнд сэлсэн бөгөөд ядах юмгүй сэлж байсан учир одоо 25 метрийн усан бассейнд долоо хоногтоо хоёр удаа сэлдэг болсон гэнэ. 
Жирийн хүүхэд бол хамгийн эртдээ гурваас дөрвөн настайдаа сэлж сурдаг. Гэтэл бүр хорвоод мэндлэх ёстой хоногоосоо зургаан долоо хоногоор өмнө төрж, инкубаторт гурван долоо хоног байсан энэ хоёр ихэр нэг ой ч хүрээгүй байхдаа ингэж сэлж байгаа нь ёстой гайхамшиг болж байна. Усанд орохоороо маш их баярладаг, усан доор сэлэхдээ огт түүртдэггүй энэ гайхамшигтай чадварыг нь сайн хөгжүүлбэл 2028 оны олимпоос заавал нэг юм дуулгана хэмээн ойр дотныхон нь найдлага тавьж эхэлсэн гэнэ. 
Ээж нь эхлээд хүүхдүүдээ өөр дээрээ тэвэрч явж, усанд оруулдаг байжээ.
Ихрүүд усанд сэлснийхээ дараа нам унтдаг гэнэ.
Ихрүүдийн том нь болох эгч нь түрүүлж сэлж сурсан гэнэ.
