Монголын хошин урлагийн хамгийн залуу хамтлаг “Мөрөөдлийн театр” сар шинээр хилийн чанадад байх гэнэ. Тэд АНУ дахь монголчууддаа зориулж шилдэг тоглолтуудаа хийхээр төлөвлөжээ. Энэ тоглолтын сурталчилгаа интернэтээр аль хэдийнэ түгэж, үзэгчдийнхээ сэтгэлийг гэгэлзүүлж байна. Өнгөрсөн онд “Амьдрал өөрөө бэлэг”, “Хайртай бол эргэж хараарай”, “Их ид шидтэн” зэрэг жүжиг, “Ээжийн дайсан” уран сайхны кино бүтээсэн бол Америк дахь монголчууддаа тайлан тоглолтоо зориулах юм  байна. Тоглолтын дараа гэгээн хайрын “Валентины” баярын үдэшлэг хийхээр төлөвлөжээ.
Үүнээс гадна “Мөрөөдлийн театр” энэ оны уран бүтээлийнхээ бэлтгэлд орсон байна. Гуравдугаар сард үзэгчдэд толилуулах шинэ тоглолтынхоо клипний зураг авах ажлыг Сэлэнгэ аймгийн Мандал суманд хийж яваа. Энэ ажлаа дуусгаад АНУ-г зорих юм байна.